پرەزيدەنت قاسىم-جومارت توقاەۆ قورعانىس ۆەدومستۆوسىنىڭ باسشىلىق قۇرامىمەن وتكەن كەڭەستە اسكەردى رەفورمالاۋ كەرەگىن ايتتى، دەپ حابارلايدى "ادىرنا".
جيىن ماڭعىستاۋ وبلىسىندا وتكەن وقۋ-جاتتىعۋ كەزىندە قازا تاپقان 14 اسكەري قىزمەتشىنى ءبىر مينۋت ۇنسىزدىكپەن ەسكە الۋدان باستالدى. مەملەكەت باسشىسى بولعان وقيعاعا قاتاڭ باعا بەردى.
"مەن قازا بولعان ءاربىر اسكەري قىزمەتشىنىڭ اتا-اناسىنا كوڭىل ايتىپ، ارنايى جەدەلحاتىمدى جولدادىم. قايتىس بولعان ازاماتتاردىڭ وتباسىلارىنا بارلىق قاجەتتى كومەك كورسەتىلەدى. ولاردىڭ ەشقايسىسى قولداۋسىز، كومەكسىز قالمايدى", – دەدى قاسىم-جومارت توقاەۆ.
قاسىم-جومارت توقاەۆ قايعىلى وقيعانىڭ ءمان-جايىن عانا ەمەس، مۇنداي وقۋ-جاتتىعۋدى جوسپارلاۋعا نە تۇرتكى بولعانىن جانە قويىلعان مىندەتتىڭ قازىرگى قاۋىپ-قاتەرلەرگە قانشالىقتى ساي كەلەتىنىن انىقتاۋدى تالاپ ەتتى.
"قارۋلى كۇشتەر باسشىلىعى قوردالانعان تۇيتكىلدەردى جىلدار بويى شەشە الماي كەلەدى. بۇل ەلىمىزدىڭ قورعانىس قابىلەتىنە نۇقسان كەلتىرەدى. وتكەن قايعىلى وقيعالاردان ساباق المادىڭىزدار. اتالعان وقۋ-جاتتىعۋ جيىنىنىڭ ءمانى دە، ماقساتى دا تۇسىنىكسىز. ونى كىم ازىرلەپ، بەكىتتى؟ باس شتابتىڭ ءرولى قانداي؟ ۇيلەستىرۋ جۇمىستارىنا نەگە ءمان بەرمەگەن؟ نەلىكتەن وقۋ-جاتتىعۋ جيىنىندا اسكەري-تەڭىز كۇشتەرىنىڭ باس قولباسشىسى بولماعان؟ جاۋاپسىزدىق، سالعىرتتىق، كوزبوياۋشىلىق بەلەڭ العان. جۇيەلى جۇمىس جوق. داعدارىس جاعدايىنداعى ءىس-قيمىل جوسپارى سىن كوتەرمەيدى. مۇنىڭ ءبارى – اسكەري ۆەدومستۆو باسشىلىعىنىڭ نەمقۇرايدىلىعىنىڭ سالدارى", – دەدى مەملەكەت باسشىسى.
تەكسەرۋ بارىسىندا اسكەري قىزمەتتى ۇيىمداستىرۋ، اسكەردى جابدىقتاۋ، سونداي-اق ونىڭ ماتەريالدىق جانە قارجىلىق تۇرعىدان قامتاماسىز ەتىلۋى جان-جاقتى زەردەلەنەدى.
قاۋىپسىزدىك كەڭەسى توراعاسىنىڭ ورىنباسارى ايدا بالاەۆا باسقاراتىن كوميسسيا جۇيەلى سيپات العان زاڭ بۇزۋشىلىقتاردى انىقتاپ، كىمدەردىڭ جاۋاپقا تارتىلاتىنىن ايقىنداۋى قاجەت. مەملەكەت باسشىسى اسكەري قىزمەتشىلەر لاۋازىمىنا، شەنىنە قاراماستان جاۋاپقا تارتىلاتىنىن، زاڭ بويىنشا قاتاڭ جازاسىن الاتىنىن ەسكەرتتى. اتالعان ماسەلە پرەزيدەنتتىڭ جەكە باقىلاۋىندا.
“بۇل وقيعا ارميادا ولقىلىقتار وتە كوپ ەكەنىن جانە كاسىبيلىك جەتىسپەيتىنىن انىق كورسەتتى. اسكەردى تۇبەگەيلى رەفورمالاۋدى ىسكە اسىراتىن ۋاقىت كەلدى. بۇل – كەزەك كۇتتىرمەيتىن ماسەلە. مەن وسىعان بايلانىستى كادرلىق شەشىمدەر قابىلدادىم. سىزدەرگە قازاقستان رەسپۋبليكاسىنىڭ جاڭا قورعانىس ءمينيسترى مىرزاحمەتوۆ ايدوس ساكەنۇلىن تانىستىرعىم كەلەدى. ايدوس ساكەنۇلى كۇردەلى كەزەڭدە قىزمەتكە كىرىسىپ جاتىر. جاۋاپكەرشىلىك – وتە جوعارى، الداعى مىندەتتەر – اسا كۇردەلى. باتىل شەشىمدەر قابىلدانۋعا ءتيىس”، – دەدى مەملەكەت باسشىسى.
قاسىم-جومارت توقاەۆ قورعانىس ۆەدومستۆوسىنىڭ جۇمىسىن تۇبەگەيلى ترانسفورماتسيالاۋ ماسەلەسىنە توقتالدى
“جاقىندا قاۋىپسىزدىك كەڭەسى اپپاراتىمەن وتكەن جيىندا اسكەري سالادا اتقارىلاتىن باسىم مىندەتتەردى ايقىندادىم. ءبىزدىڭ ارميا وتكەن عاسىردا قالىپ قويعان. سونىمەن قاتار قولباسشىلىق جۇيەسىن حالىقارالىق ۇزدىك تاجىريبەگە ساي قايتا قۇرۋ كەرەك. كەشەندى ءتاسىل قولدانۋ قاجەت. ال ول ءۇشىن باعىت-باعدارىمىز انىق بولعانى ءجون. بۇل دۇنيەتانىمى كەڭ، ساۋاتتى وفيتسەرلەردىڭ عانا قولىنان كەلەدى. رەفورمانىڭ ماقساتى – جاڭا ۇلگىدەگى اسكەر جاساقتاۋ”، – دەدى مەملەكەت باسشىسى.
پرەزيدەنت ارميادا تسيفرلىق ترانسفورماتسيا جۇرگىزۋدى، مۇمكىندىگىنشە ادامدى تەحنولوگيامەن الماستىرۋدى تاپسىردى.
“اسكەردى دامىتۋدىڭ جاڭاشا تاسىلدەرى قاجەت. تاپتاۋرىن شەشىمدەر، الدامشى امالدار، قاعاز جۇزىندە ءبارىن كەرەمەت ەتىپ كورسەتەتىن وتىرىك ەسەپتەر ەشكىمگە قاجەت ەمەس”، – دەدى پرەزيدەنت.
