Qazaqstannyŋ qorǧanys ministrı Däuren Qosanov Maŋǧystau oblysynda Kaspii teŋızındegı äskeri oqu-jattyǧu kezınde qaza tapqan äskeri qyzmetşılerdıŋ otbasylaryna bardy, dep habarlaidy "Adyrna" ūlttyq portaly.
Ministr marqūmdardyŋ tuǧan-tuystary men jaqyndaryna köŋıl aityp, olardyŋ qaiǧysyna ortaq ekenın jetkızdı.
«Olar bız üşın jai ǧana äskeri qyzmetkerler emes – bızdıŋ qarulastarymyz, ūldarymyz ben bauyrlarymyz. Olardyŋ qazasy – barşa qaruly küşter üşın orny tolmas auyr qaza. Bız tuǧan-tuystary men jaqyndarynyŋ qaiǧysyna ortaqtasyp, osy qiyn kezeŋde olarmen bırge bolamyz», – dedı Däuren Qosanov.
Qaza tapqan äskeri qyzmetşılerdıŋ arasynda Meirambek Berdıhanov, Azamat Mädıhan jäne Dastan Begei bar. Olar Jaŋaözen qalasynan, al Miras Tūrdybekūly Jetıbai auylynan merzımdı äskeri qyzmetke şaqyrylǧan.
Qorǧanys ministrlıgınıŋ mälımetınşe, äskeri qyzmetşıler qyzmet barysynda öz mındetterın jauapkerşılıkpen atqaryp, tärtıptı sarbaz retınde tanylǧan.
Däuren Qosanov marqūmdardyŋ otbasylaryna qajettı kömek körsetıletının aitty. Qorǧanys ministrlıgı qaza bolǧandardyŋ jaqyndaryna jan-jaqty qoldau körsetıp, tuyndaǧan mäselelerdı şeşuge järdemdesedı. Vedomstvo otbasylarmen tūraqty bailanysta bolady.
Eske salaiyq, 24 qyrküiekte Maŋǧystau oblysynda äskeri-teŋız küşterınıŋ oqu-jattyǧuy kezınde aua raiy kürt naşarlap, qatty jel soqqan. Sonyŋ saldarynan 17 äskeri qyzmetşı teŋızge tüsıp ketken. Alǧaşqy mälımet boiynşa, on tört äskeri qyzmetşınıŋ qaza bolǧany, üşeuınıŋ qūtqarylǧany habarlandy.
