اكادەميك ە. ا. بوكەتوۆ اتىنداعى قاراعاندى ۇلتتىق زەرتتەۋ ۋنيۆەرسيتەتىنىڭ ستۋدەنتتەرىنەن تۋبەركۋلەز انىقتالدى. بۇل اقپاراتتى Tengri Health تىلشىسىنە ءوڭىردىڭ سانيتاريالىق-ەپيدەميولوگيالىق باقىلاۋ باسقارماسى راستاعان، دەپ حابارلايدى "ادىرنا".
الەۋمەتتىك جەلىلەردە قاراعاندىداعى اكادەميك ە. ا. بوكەتوۆ اتىنداعى ۋنيۆەرسيتەتتىڭ 10 ستۋدەنتى تۋبەركۋلەزبەن اۋىرعانى تۋرالى اقپارات تاراعان.
«ەشكىم ەشتەڭە ايتپاي ما؟ كارانتين ەنگىزۋ كەرەك قوي! تاعى قانشا ستۋدەنت اۋىرىپ، ءبىر-بىرىنە جۇقتىرىپ ءجۇر؟ كارانتين دە، دۇرىس دەزينفەكتسيا دا جوق!» – دەپ جازبا اۆتورى نارازىلىق بىلدىرگەن.
الايدا رەسمي تۇردە 10 ستۋدەنتتىڭ اۋىرعانى تۋرالى اقپارات راستالمادى.
قاراعاندى قالاسى قازىبەك بي اتىنداعى اۋداننىڭ سانيتاريالىق-ەپيدەميولوگيالىق باقىلاۋ باسقارماسىنىڭ باسشىسى نۇرلان ايماعانبەتوۆ ۋنيۆەرسيتەتتە تۋبەركۋلەزدىڭ بىرنەشە جاعدايى تىركەلگەنىن، بىراق ءسوز ءۇش ستۋدەنت تۋرالى بولىپ وتىرعانىن ايتتى.
ونىڭ ايتۋىنشا، ولار ءارتۇرلى فاكۋلتەتتەردە وقيدى جانە بىرگە تۇرمايدى.
ء«بىر ستۋدەنت بيولوگيا-گەوگرافيا فاكۋلتەتىندە، ەكىنشىسى شەتەل تىلدەرى فاكۋلتەتىندە، ءۇشىنشىسى جۋرناليستيكا فاكۋلتەتىندە وقيدى. ۇشەۋى دە جاتاقحانادا ەمەس، ءارتۇرلى مەكەنجايداعى پاتەرلەردە تۇرادى»، – دەدى نۇرلان ايماعانبەتوۆ.
ءبىرىنشى جاعداي 22 قىركۇيەكتە تىركەلگەن، ەكىنشى جاعداي كەلەسى كۇنى انىقتالعان. ال ءۇشىنشى ستۋدەنتكە قاتىستى شۇعىل حابارلاما 24 قىركۇيەك كۇنى كەشكە تۇسكەن.
قازىر ماماندار بۇل جاعدايلاردىڭ ءوزارا بايلانىستى-بولماعانىن انىقتاپ جاتىر. سانيتاريالىق-ەپيدەميولوگيالىق باقىلاۋ باسقارماسى تەكسەرۋ جۇمىستارىن جۇرگىزىپ، ناۋقاستارمەن بايلانىستا بولعان ادامداردىڭ شەڭبەرىن انىقتاۋدا.
«جاقىن جانە الىس بايلانىستا بولعان ادامدار تەكسەرىلىپ جاتىر. مەديتسينالىق تەكسەرۋلەر جۇرگىزىلىپ، كىمدە اۋرۋ بار، كىمدە جوق ەكەنى جانە ولاردىڭ سوڭعى رەت قاشان تەكسەرۋدەن وتكەنى انىقتالۋدا»، – دەپ ءتۇسىندىردى باسقارما باسشىسى.
نۇرلان ايماعانبەتوۆتىڭ ايتۋىنشا، ۋنيۆەرسيتەتتە دەزينفەكتسيا جۇمىستارى جۇرگىزىلگەن. سونىمەن قاتار، ونىڭ سوزىنشە، انىقتالعان تۋبەركۋلەز جاعدايلارىنا بايلانىستى ۋنيۆەرسيتەتتە كارانتين ەنگىزىلمەيدى.
