پرەزيدەنت قاسىم-جومارت توقاەۆ قازاقستان حالىق كەڭەسىنىڭ سەسسياسىندا مەملەكەتتىك ءتىلدىڭ مارتەبەسى مەن قوعامداعى ورنى تۋرالى پىكىر ءبىلدىردى. مەملەكەت باسشىسى سوڭعى جىلدارى قازاق ءتىلىنىڭ قولدانۋ اياسى ەداۋىر كەڭەيىپ، ونىڭ ەلدەگى بىرىكتىرۋشى كۇشكە اينالعانىن اتاپ ءوتتى، دەپ حابارلايدى «ادىرنا» ءتىلشىسى.
پرەزيدەنتتىڭ ايتۋىنشا، قازاق ءتىلى بۇگىندە ەشقانداي اكىمشىلىك نەمەسە ساياسي قىسىمسىز كوپشىلىكتىڭ تىلىنە اينالىپ كەلەدى.
«وسىعان دەيىن بىرنەشە مارتە ايتقانمىن: ۇلتتى ۇيىستىرىپ، مەملەكەتىمىزدىڭ ىرگەسىن بەكەمدەيتىن ەڭ ماڭىزدى فاكتور – مەملەكەتتىك ءتىل.
بۇرىن بولجاممەن، دولبارمەن عانا ايتىلاتىن جاعداي قازىر شىندىققا اينالدى. قازاق ءتىلى قانداي دا ءبىر اكىمشىلىك، ءتىپتى ساياسي ماجبۇرلەۋسىز ءورىسى كەڭەيىپ، كوپشىلىكتىڭ تىلىنە اينالدى. اسىرەسە، جاستارىمىزدىڭ قازاق تىلىندە ەركىن، ساۋاتتى سويلەيتىنى قۋانتادى»،–دەدى ول.
پرەزيدەنت انا ءتىلى ۇلتتىق مادەنيەت پەن بولمىستى تانىتاتىن باستى قۇندىلىق ەكەنىن اتاپ ءوتتى.
«انا ءتىلىمىز مەملەكەتتىك ءتىل رەتىندە سۇرانىسقا يە، ۇلتتىق مادەنيەتىمىزدى، بولمىسىمىزدى شىرايلى دا شۇرايلى تۋعان ءتىلىمىز ارقىلى كورسەتەمىز. قازاق تىلىندە ءبىر اۋىز ءسوز ايتا الماۋ بىلىمسىزدىكتىڭ بەلگىسىنە اينالدى. مۇنىڭ ءبارى – تولەرانتتىق پەن سەنىمگە نەگىزدەلگەن ورتاق جۇمىستىڭ ناتيجەسى. الايدا بۇل باسقا تىلدەردەن باس تارتۋ كەرەك دەگەندى بىلدىرمەيدى، ءارى ولاردى شەتتەتۋگە قۇقىق بەرمەيدى. وزدەرىڭىزگە ءمالىم، كونستيتۋتسيادا تىلىنە، تەگىنە، ۇلتىنا، دiني كوزقاراسى مەن نانىمىنا نەمەسە كەز كەلگەن وزگە دە سەبەپتەرگە بايلانىستى كەمسىتۋگە تىيىم سالىنعان.
سوعان قاراماستان ارا-تۇرا كەيبىر تىسقاققان ارانداتۋشىلار الەۋمەتتىك جەلىدە ۇلتارازدىقتى قوزدىرىپ، ادەيى وتقا ماي قۇيادى. مىنا نارسەنى تۇسىنگەن ءجون. ولاردىڭ كوزدەگەنى بىرەۋ – قوعامدى السىرەتىپ، قازاقستاننىڭ ەگەمەندىگىنە نۇقسان كەلتىرۋ، ەلدى بىرلىكتەن ايىرىپ، بەيبىت، الاڭسىز ءومىرىمىزدىڭ استاڭ-كەستەڭىن شىعارۋ. راسىندا ولار بالالارىمىز بەن نەمەرەلەرىمىزدىڭ باقىتتى بولاشاعىنىڭ تامىرىنا بالتا شاپقىسى كەلەدى. سوندىقتان قۇقىق قورعاۋ ورگاندارى مەن تۇتاس قوعام بۇعان تاباندى تۇردە قارسى تۇرۋى كەرەك. كونستيتۋتسيادا بەكىتىلگەن «زاڭ مەن ءتارتىپ» قاعيداتىنا ساي ارەكەت ەتۋىمىز قاجەت»،– دەپ تۇيىندەدى مەملەكەت باسشىسى.
