Prezident Qasym-Jomart Toqaev Qazaqstan Halyq Keŋesınıŋ sessiiasynda memlekettık tıldıŋ märtebesı men qoǧamdaǧy orny turaly pıkır bıldırdı. Memleket basşysy soŋǧy jyldary qazaq tılınıŋ qoldanu aiasy edäuır keŋeiıp, onyŋ eldegı bırıktıruşı küşke ainalǧanyn atap öttı, dep habarlaidy «Adyrna» tılşısı.
Prezidenttıŋ aituynşa, qazaq tılı bügınde eşqandai äkımşılık nemese saiasi qysymsyz köpşılıktıŋ tılıne ainalyp keledı.
«Osyǧan deiın bırneşe märte aitqanmyn: ūltty ūiystyryp, memleketımızdıŋ ırgesın bekemdeitın eŋ maŋyzdy faktor – memlekettık tıl.
Būryn boljammen, dolbarmen ǧana aitylatyn jaǧdai qazır şyndyqqa ainaldy. Qazaq tılı qandai da bır äkımşılık, tıptı saiasi mäjbürleusız örısı keŋeiıp, köpşılıktıŋ tılıne ainaldy. Äsırese, jastarymyzdyŋ qazaq tılınde erkın, sauatty söileitını quantady»,–dedı ol.
Prezident ana tılı ūlttyq mädeniet pen bolmysty tanytatyn basty qūndylyq ekenın atap öttı.
«Ana tılımız memlekettık tıl retınde sūranysqa ie, ūlttyq mädenietımızdı, bolmysymyzdy şyraily da şūraily tuǧan tılımız arqyly körsetemız. Qazaq tılınde bır auyz söz aita almau bılımsızdıktıŋ belgısıne ainaldy. Mūnyŋ bärı – toleranttyq pen senımge negızdelgen ortaq jūmystyŋ nätijesı. Alaida būl basqa tılderden bas tartu kerek degendı bıldırmeidı, ärı olardy şettetuge qūqyq bermeidı. Özderıŋızge mälım, Konstitusiiada tılıne, tegıne, ūltyna, dini közqarasy men nanymyna nemese kez kelgen özge de sebepterge bailanysty kemsıtuge tyiym salynǧan.
Soǧan qaramastan ara-tūra keibır tısqaqqan arandatuşylar äleumettık jelıde ūltarazdyqty qozdyryp, ädeiı otqa mai qūiady. Myna närsenı tüsıngen jön. Olardyŋ közdegenı bıreu – qoǧamdy älsıretıp, Qazaqstannyŋ Egemendıgıne nūqsan keltıru, eldı bırlıkten aiyryp, beibıt, alaŋsyz ömırımızdıŋ astaŋ-kesteŋın şyǧaru. Rasynda olar balalarymyz ben nemerelerımızdıŋ baqytty bolaşaǧynyŋ tamyryna balta şapqysy keledı. Sondyqtan qūqyq qorǧau organdary men tūtas qoǧam būǧan tabandy türde qarsy tūruy kerek. Konstitusiiada bekıtılgen «Zaŋ men tärtıp» qaǧidatyna sai äreket etuımız qajet»,– dep tüiındedı memleket basşysy.
