2023 جىلدان بەرى ەلىمىزدە ء«بىلىم بەرۋدەگى وزگەرىستەردىڭ 1000 كوشباسشىسى» ستراتەگيالىق جوباسى ىسكە اسىرىلۋدا. مەملەكەت باسشىسىنىڭ تاپسىرماسى بويىنشا جۇزەگە اسىپ جاتقان جوبا باسقارۋشىلاردىڭ جاڭا بۋىنىن قالىپتاستىرۋعا باعىتتالعان.
پرەزيدەنتتىك جاستار كادر رەزەرۆىنىڭ ۇلگىسىندە جاسالعان جوبا ناتيجەسىندە 2023-2024 جىلدارى 583 پەداگوگ رەزەرۆيست اتاندى. ونىڭ 400-دەن استامى باسشىلىق قىزمەتكە كونكۋرسسىز تاعايىندالسا، 40 ديرەكتور بۇگىندە «كەلەشەك مەكتەپتەرى» ۇلتتىق جوباسى اياسىندا اشىلعان مەكتەپتەردى باسقارىپ وتىر. وسىلايشا، قازاقستانداعى مەكتەپ ديرەكتورلارىنىڭ تاپشىلىعى ءۇش ەسەگە قىسقاردى.
جوبا جالعاسىن تاۋىپ 2025 جىلى تاعى 428 ۇمىتكەر وقۋدان ءوتتى. نزم پەداگوگيكالىق شەبەرلىك ورتالىعىندا مەكتەپ ديرەكتورلارىنىڭ ورىنباسارلارىن وقىتۋ 21 شىلدەدە باستالىپ 12 قىركۇيەكتە اياقتالدى. ءبىلىم بەرۋدەگى وزگەرىس كوشباسشىلارى بىرنەشە كەزەڭ بويى ىرىكتەلىپ، ءۇش دەڭگەيدە بىلىكتىلىگىن ارتتىرعان سوڭ قورىتىندى باعالاۋعا جىبەرىلگەن بولاتىن.
باعدارلاما قاتىسۋشىلارى 15-26 قىركۇيەك ارالىعىندا وتكەن قورىتىندى باعالاۋدان ءوتۋ ءۇشىن رەفلەكسيۆتى ەسەپ ازىرلەدى. وندا ۇمىتكەرلەر العان بىلىمدەرىن تاجىريبەدە قولدانا بىلەتىنىن دالەلدەۋى قاجەت. اتالعان ماتەريالدار بەلگىلەنگەن كريتەريلەرگە سايكەس تەكسەرىلىپ، «نازارباەۆ زياتكەرلىك مەكتەپتەرى» دببۇ پەداگوگيكالىق ولشەۋلەر ورتالىعىنىڭ سىرتقى ساراپتاماسىنا جولداندى. بۇل كەزەڭنەن ءساتتى وتكەن ماماندار كادرلىق رەزەرۆكە قوسىلۋ ءۇشىن وقۋ-اعارتۋ مينيسترلىگى جانىنداعى كوميسسيامەن اڭگىمەلەسۋگە جولداما الدى.
ەستەرىڭىزگە سالا كەتەيىك، ء«بىلىم بەرۋدەگى وزگەرىستەردىڭ 1000 كوشباسشىسى» جوباسىن ءساتتى اياقتاعان جانە كادر رەزەرۆىنە كىرگەن ماماندار كونكۋرستىق راسىمدەردەن وتپەي-اق ءبىرىنشى باسشىنىڭ بوس ورنىنا تاعايىندالادى.
