فوتو: Report
ازەربايجاندا تۇركيا مەن وزبەكستان اسكەري قىزمەتشىلەرى دە قاتىسقان «بىرلىك كۇشى – 2026» بىرلەسكەن اسكەري وقۋ-جاتتىعۋى اياقتالدى، دەپ حابارلايدى "ادىرنا".
Report اگەنتتىگىنىڭ ازەربايجان قورعانىس مينيسترلىگىنە سىلتەمە جاساپ حابارلاۋىنشا، وقۋ-جاتتىعۋلار قاراباح ەكونوميكالىق اۋدانىنداعى «گىزىلگايا» وقۋ ورتالىعىندا، ناحچىۆان اۆتونوميالىق رەسپۋبليكاسىنداعى «قاراباحلار» وقۋ ورتالىعىندا جانە كاسپي تەڭىزىندەگى ازەربايجان اكۆاتورياسىندا ورنالاسقان «بيويۋك زيريا» پوليگونىندا ءوتتى.
جاتتىعۋلاردىڭ جابىلۋ ءراسىمى جوعارى لاۋازىمدى باقىلاۋشى كۇنى وتكىزىلگەننەن كەيىن ۇيىمداستىرىلدى. اسكەري وركەستردىڭ سۇيەمەلدەۋىمەن ازەربايجان، تۇركيا جانە وزبەكستاننىڭ مەملەكەتتىك ءانۇراندارى ورىندالدى.
ءراسىم بارىسىندا ءسوز سويلەگەندەر ءۇش ەلدىڭ اسكەري قىزمەتشىلەرى قاتىسقان وقۋ-جاتتىعۋ تاجىريبە الماسۋعا، جاۋىنگەرلىك دايارلىق دەڭگەيىن ارتتىرۋعا جانە دوستىق بايلانىستاردى نىعايتۋعا ىقپال ەتكەنىن اتاپ ءوتتى. توعىز ەلدىڭ وكىلى وقۋ-جاتتىعۋلارعا باقىلاۋشى رەتىندە قاتىستى.
تۇركيانىڭ ۇلتتىق قورعانىس ءمينيسترى ياشار گيۋلەر بەيبىتشىلىك پەن تۇراقتىلىقتى ساقتاۋ ءۇشىن ءاردايىم سوعىسقا دايىن بولۋ قاجەت دەپ سانايدى.
مينيستر ازەربايجان، تۇركيا جانە وزبەكستان اسكەري قىزمەتشىلەرىنىڭ وقۋ-جاتتىعۋ اياسىنداعى دايارلىعى ءساتتى اياقتالعانىن اتاپ ءوتتى.
«وقۋ-جاتتىعۋعا قاتىسقان باۋىرلارىمدى قۇتتىقتايمىن. الداعى ۋاقىتتا قىرعىزستان مەن قازاقستاننان دا باۋىرلارىمىزدىڭ قاتىسۋىمەن بۇدان دا اۋقىمدى بىرلەسكەن وقۋ-جاتتىعۋلاردى جوسپارلاپ، ءساتتى وتكىزەتىنىمىزگە سەنەمىن. ەگەر بەيبىتشىلىك پەن تىنىشتىقتى قالاساق، سوعىسقا دايىن بولۋىمىز كەرەك. سوندىقتان وڭىردەگى جاعدايدى ەسكەرە وتىرىپ، دايىندىق دەڭگەيىمىزدى بارىنشا قامتاماسىز ەتىپ، بەيبىت ءومىر سۇرەتىن بولامىز»، – دەدى ياشار گيۋلەر.
سونداي-اق كۇردەلى جەر بەدەرىندە، شىنايى ۇرىس جاعدايىنا بارىنشا جاقىن ورتادا تاپسىرمالاردى ورىنداۋ كەزىندە اسكەري قىزمەتشىلەر جوعارى كاسىبي شەبەرلىك، تاكتيكالىق ساۋاتتىلىق پەن ءىس-قيمىل ۇيلەسىمدىلىگىن كورسەتكەنى ايتىلدى. اسكەري قىزمەتشىلەر الدىنا قويىلعان مىندەتتەردى ويداعىداي ورىندادى.
ءىس-شارا سوڭىندا وقۋ-جاتتىعۋ بارىسىندا ەرەكشەلەنگەن اسكەري قىزمەتشىلەرگە سىيلىقتار تابىستالدى. بۇدان كەيىن جاتتىعۋعا قاتىسقان اسكەري قىزمەتشىلەر مىنبەر الدىنان سالتاناتتى شەرۋمەن ءوتتى.
جابىلۋ ءراسىمى ازەربايجاننىڭ ازي اسلانوۆ اتىنداعى اسكەري يدەولوگيالىق جانە مادەني ورتالىعى شىعارماشىلىق ۇجىمىنىڭ ونەر كورسەتۋىمەن اياقتالدى.
