ەستۋ قابىلەتى بۇزىلعان سپورتشىلار اراسىنداعى قازاقستان چەمپيونى، 28 جاستاعى ءادىل تىلەكتەس شىمكەنتتەگى كاسىپورىنداردىڭ بىرىندە جۇمىس بارىسىندا قازا تاپتى. اقپاراتتى شىمكەنت قالالىق پوليتسيا دەپارتامەنتى راستادى، دەپ حابارلايدى «ادىرنا» ءتىلشىسى.
قايعىلى وقيعا 12 قىركۇيەكتە بولعان.
«قالاداعى كاسىپورىنداردىڭ ءبىرىنىڭ اۋماعىندا جۇمىسشىنىڭ قازا بولۋ دەرەگى بويىنشا سوتقا دەيىنگى تەرگەۋ جۇرگىزىلىپ جاتىر. الدىن الا مالىمەت بويىنشا، ەر ادام جۇمىس جۇرگىزۋ كەزىندە ەلەكتر توعىنىڭ سوعۋىنان اۋىر جاراقات الىپ، كوز جۇمعان. قازىرگى ۋاقىتتا وقيعانىڭ بارلىق ءمان-جايىن انىقتاۋعا باعىتتالعان قاجەتتى تەرگەۋ ارەكەتتەرى جۇرگىزىلۋدە. قر قىلمىستىق-پروتسەستىك كودەكسىنىڭ 201-بابىنا سايكەس، تەرگەۋ مۇددەسىنە بايلانىستى وزگە مالىمەتتەر جاريا ەتىلمەيدى»،– دەلىنگەن حابارلامادا.
ءادىل تىلەكتەس 1998 جىلى دۇنيەگە كەلگەن. ول ەركىن جانە گرەك-ريم كۇرەسىمەن اينالىسىپ، ەستۋ قابىلەتى بۇزىلعان سپورتشىلار اراسىنداعى جارىستاردا ونەر كورسەتكەن. 2018 جىلى اقتوبە قالاسىندا وتكەن قازاقستان رەسپۋبليكاسىنىڭ ءىى سپارتاكياداسىندا گرەك-ريم كۇرەسىنەن 55 كەلىگە دەيىنگى سالماق دارەجەسىندە چەمپيون اتانعان. ال 2019 جىلى قوستانايدا وتكەن ەرەسەكتەر اراسىنداعى قازاقستاننىڭ كوماندالىق چەمپيوناتىندا 60 كەلىگە دەيىنگى سالماقتا ءبىرىنشى ورىندى جەڭىپ العان. سپورتشى رەسپۋبليكالىق جانە حالىقارالىق جارىستاردا بىرنەشە مارتە جۇلدەگەر بولعان.
مارقۇمنىڭ ارتىندا جۇبايى مەن ەكى بالاسى قالدى.
