تسيفرلىق تەڭگە تسيفرلىق قارجى سەرۆيستەرىن دامىتۋ قۇرالىنا اينالۋى مۇمكىن، دەپ حابارلايدى "ادىرنا".
بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
ۇكىمەت باسشىسىنىڭ ايتۋىنشا، توكەنيزاتسيا نارىعى مەن كريپتويندۋستريانىڭ بەلسەندى دامۋى اياسىندا الاياقتىقتىڭ جاڭا تۇرلەرى پايدا بولىپ جاتىر. وسىعان بايلانىستى ازاماتتاردى تسيفرلىق ورتاداعى قاۋىپتەردەن قورعاۋ شارالارىن كۇشەيتۋ قاجەت.
ول جاساندى ينتەللەكت مينيسترلىگىنە ۇلتتىق بانكپەن بىرلەسىپ، كيبەرقاۋىپسىزدىكتى قامتاماسىز ەتۋ جانە وسى باعىتتاعى زاڭنامانى جەتىلدىرۋ بويىنشا جۇمىستى جالعاستىرۋدى تاپسىردى.
پرەمەر-مينيستر تسيفرلىق تەڭگەنى ەنگىزۋ دە ماڭىزدى باعىتتاردىڭ ءبىرى ەكەنىن اتاپ ءوتتى. ونىڭ سوزىنشە، جوبا تولەم ينفراقۇرىلىمىن جاڭعىرتۋعا جانە قارجى جۇيەسىنىڭ تيىمدىلىگىن ارتتىرۋعا باعىتتالعان.
«تسيفرلىق تەڭگەنىڭ كريپتوۆاليۋتالاردان ايىرماشىلىعى – ول ۇلتتىق بانك شىعاراتىن ورتالىقتاندىرىلعان تسيفرلىق ۆاليۋتا جانە زاڭدى تولەم قۇرالى»، – دەدى ولجاس بەكتەنوۆ.
ونىڭ پىكىرىنشە، تسيفرلىق تەڭگەنى قولدانۋ مەملەكەتتىك شىعىستاردىڭ تيىمدىلىگىن ارتتىرۋعا ىقپال ەتۋى ءتيىس. سونداي-اق تسيفرلىق شارتتاردى بەكىتۋ مۇمكىندىگى مەملەكەتتىك ساتىپ الۋلار مەن كورپوراتيۆتىك وپەراتسيالارداعى ەسەپ ايىرىسۋدى اۆتوماتتاندىرۋعا جول اشادى.
ۇكىمەت باسشىسى قارجى مينيسترلىگىنە ۇلتتىق بانكپەن جانە باسقا دا مۇددەلى تاراپتارمەن بىرلەسىپ، تسيفرلىق تەڭگەنى قولدانۋ اياسىن كەڭەيتۋ ءۇشىن قاجەتتى شارالاردى پىسىقتاۋدى تاپسىردى.
