فوتو:championat.com
قازاقستاندىق تەننيسشى، الەمنىڭ ءبىرىنشى راكەتكاسى ەلەنا رىباكينا اقش-تىڭ اشىق چەمپيوناتى – US Open ءتۋرنيرىنىڭ ايەلدەر اراسىنداعى جەكەلەي سىنىندا العاش رەت جەڭىمپاز اتاندى، دەپ حابارلايدى “ادىرنا”.
13 قىركۇيەككە قاراعان ءتۇنى وتكەن فينالدىق كەزدەسۋدە رىباكينا 28 جاستاعى بەلارۋس وكىلى ارينا سوبولەنكونى 6:4, 5:7, 6:2 ەسەبىمەن جەڭدى. سوبولەنكو تۋرنيردە بەيتاراپ تۋ استىندا ونەر كورسەتتى.
وسىلايشا رىباكينا سوبولەنكونىڭ US Open تۋرنيرىندەگى قاتارىنان 19 ماتچقا سوزىلعان جەڭىستى سەرياسىن ءۇزدى. بەلورۋسسيالىق تەننيسشى بۇل سەريانى 2023 جىلعى فينالداعى جەڭىلىسىنەن كەيىن باستاپ، تۋرنيردە ەكى رەت چەمپيون اتانعان بولاتىن.
سونىمەن قاتار فينالعا بىرنەشە كۇن قالعاندا رىباكينا كاسىبي تەننيسشىلەر قاۋىمداستىعىنىڭ (ATP) رەيتينگىندە سوبولەنكونى باسىپ وزىپ، الەمنىڭ ءبىرىنشى راكەتكاسى اتاندى. بەلورۋسسيالىق سپورتشى بۇل پوزيتسيانى قاتارىنان 99 اپتا بويى ساقتاپ كەلگەن ەدى.
«بۇل تاڭعاجايىپ. بولعان وقيعانى ءالى دە ءتۇسىنۋ قيىن. سوڭعى بىرنەشە اپتادا تىم كوپ جەتىستىككە جەتتىم. مەن وتە باقىتتىمىن ءارى اتقارعان جۇمىسىم ءۇشىن ماقتانامىن. بۇل جاي عانا كەرەمەت»، – دەدى رىباكينا ماتچتان كەيىن.
US Open فينالىنداعى جەڭىس رىباكينا ءۇشىن 2026 جىلعى «ۇلكەن دۋلىعا» تۋرنيرلەرىندەگى ەكىنشى فينال بولدى. ەكى جاعدايدا دا قازاقستاندىق تەننيسشى ارينا سوبولەنكونى جەڭدى.
قاڭتار ايىندا رىباكينا Australian Open ءتۋرنيرىنىڭ فينالىندا سوبولەنكونى ۇتقان ەدى.
بۇل قازاقستان وكىلى ءۇشىن «ۇلكەن دۋلىعا» جارىستارىنداعى ەكىنشى چەمپيوندىق اتاق بولدى. 2022 جىلى رىباكينا ۇلىبريتانياداعى ۋيمبلدون تۋرنيرىندە جەڭىمپاز اتانعان.
ال سوبولەنكو Australian Open تۋرنيرىندە ەكى رەت – 2023 جانە 2024 جىلدارى چەمپيون بولعان. 2023 جىلعى فينالدا ول رىباكينانى جەڭگەن ەدى. 2026 جىلعى فينالداعى جەڭىلىس بەلورۋسسيالىق سپورتشى ءۇشىن قاتارىنان ەكىنشى ءساتسىز فينال بولدى. 2025 جىلى ول Australian Open فينالىندا امەريكالىق مەديسون كيزگە ەسە جىبەرگەن.
بۇدان بولەك، 2026 جىلعى ماۋسىم سوبولەنكو ءۇشىن 2022 جىلدان بەرگى «ۇلكەن دۋلىعا» تۋرنيرلەرىنىڭ بىرىندە دە جەڭىسكە جەتە الماعان العاشقى جىل بولدى. ول Australian Open جانە US Open فينالدارىندا جەڭىلىپ، فرانتسيا اشىق چەمپيوناتىندا («رولان گارروس») شيرەك فينالدا، ال ۋيمبلدوندا ءتورتىنشى اينالىمدا جارىستى توقتاتتى.
قازاقستان پرەزيدەنتى قاسىم-جومارت توقاەۆ ەلەنا رىباكينانى تەننيستەن اقش اشىق چەمپيوناتىنداعى جەڭىسىمەن قۇتتىقتادى.
“بۇل — ءسىزدىڭ الەمنىڭ ءبىرىنشى راكەتكاسى اتاعىنا لايىق ەكەنىڭىزدى راستايتىن تاماشا تابىس. ءسىز تاعى دا اسقان شەبەرلىك پەن تاباندىلىق تانىتىپ، جوعارى مادەنيەتىڭىزبەن كوپشىلىكتى ءتانتى ەتتىڭىز. قازاقستان حالقى جەتىستىكتەرىڭىزدى ماقتان تۇتادى. ەرەن جەڭىسىڭىز جاڭا بەلەستەردى باعىندىرۋعا جول اشسىن! ءسىزدىڭ كاسىبيلىگىڭىز قازاقستاننىڭ جاس تەننيسشىلەرى ءۇشىن ۇلگى-ونەگە”، دەلىنگەن قۇتتىقتاۋدا.
