«قازترانسويل» ۇلتتىق كومپانياسى 2026 جىلدىڭ قاڭتار–تامىز ايلارىندا اقتاۋ پورتى ارقىلى باكۋ–تبيليسي–جەيحان (بتج) مۇناي قۇبىرىنىڭ قۋاتىن پايدالانىپ، 1,034 ملن توننا قازاقستاندىق مۇناي جونەلكەن. بۇل وتكەن جىلدىڭ سايكەس كەزەڭىمەن سالىستىرعاندا 12 پايىزعا كوپ. بۇل تۋرالى كومپانيانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
جالپى، 2026 جىلدىڭ العاشقى سەگىز ايىندا ماگيسترالدىق مۇناي قۇبىرلارى ارقىلى تاسىمالدانعان قازاقستاندىق مۇناي كولەمى 4 پايىزعا ءوسىپ، 30,6 ملن تونناعا جەتتى. ال 2025 جىلى قازاقستاننىڭ بتج باعىتى ارقىلى ەكسپورتتاعان مۇناي كولەمى 1,2 ملن توننانى قۇراعان.
بۇعان دەيىن، 27 شىلدەدە، 2026 جىلدىڭ العاشقى جارتىجىلدىعىندا بتج مۇناي قۇبىرى ارقىلى تاسىمالدانعان مۇناي كولەمى وتكەن جىلدىڭ وسى كەزەڭىمەن سالىستىرعاندا 8,8 پايىزعا ازايىپ، 12,7 ملن توننا بولعانى حابارلانعان ەدى.
ازەربايجاننىڭ ماگيسترالدىق مۇناي قۇبىرلارى ارقىلى تاسىمالدانعان شيكىزاتتىڭ جالپى كولەمىندەگى بۇل باعىتتىڭ ۇلەسى 76,8 پايىزدى قۇرادى. سونىمەن قاتار ترانزيتتىك جەتكىزىلىمدەر كولەمى 3,8 پايىزعا قىسقارىپ، 2,25 ملن تونناعا دەيىن تومەندەگەن.
