بيىلعى جىلدىڭ العاشقى ەكى ايىنىڭ قورىتىندىسى بويىنشا شىڭجاڭ-ۇيعىر اۆتونوميالىق اۋدانىنداعى (سولتۇستىك-باتىس قىتاي) «قورعاس» اۆتوموبيل وتكىزۋ پۋنكتى ارقىلى جاڭا پىسكەن جەمىستەر مەن كوكونىستەردى ەكسپورتتاۋ كولەمى 110 مىڭ توننانى قۇراپ، 46,2 پايىزعا ءوستى. بۇل تۋرالى قورعاس كەدەنىنىڭ دەرەكتەرىندە كورسەتىلگەن دەپ حابارلايدى “ادىرنا” ۇلتتىق پورتالى سينحۋا اگەنتتىگىنە سىلتەپ.
قورعاس قىتاي مەن قازاقستاننىڭ شەكاراسىندا ورنالاسقان. ول ارقىلى تەز بۇزىلاتىن ونىمدەردى نەگىزگى يمپورتتاۋشىلار – قازاقستان، وزبەكستان جانە رەسەي.
جەمىستەر مەن كوكونىستەردىڭ جاڭا كۇيدە ساقتالۋى مەن كەدەندىك راسىمدەردەن جەدەل ءارى كەدەرگىسىز ءوتۋىن قامتاماسىز ەتۋ ءۇشىن قورعاس كەدەنىندە ارنايى «جاسىل ءدالىز» اشىلعان.
«قازىرگى ۋاقىتتا جەمىستەر مەن كوكونىستەردى ەكسپورتتاۋدىڭ قىزعان ماۋسىمى ءجۇرىپ جاتىر جانە ءبىزدىڭ كومپانيا كۇن سايىن 70-تەن استام اۋىر جۇك كولىگىن جىبەرەدى. وسى جىلدىڭ باسىنان بەرى ءبىز 60 مىڭ توننا جەمىستەر مەن كوكونىستەردى ەكسپورتتادىق، ال ساۋدا كولەمى 1 ميلليارد يۋاندى (شامامەن 139 ميلليون اقش دوللارىن) قۇرادى»، - دەدى حالىقارالىق ساۋدامەن اينالىساتىن جەرگىلىكتى كومپانيانىڭ وكىلى.
