رەسەيدىڭ كاباردين-بالكاريا رەسپۋبليكاسىنداعى بەزەنگي شاتقالىندا بولعان قايعىلى وقيعاعا قار مەن مۇزدىڭ جاپپاي وپىرىلۋى سەبەپ بولعان، دەپ حابارلايدى "ادىرنا" ۇلتتىق پورتالى.
رەسەي الپينيزم فەدەراتسيا ساراپشىسى الەكساندر ياكوۆەنكونىڭ ايتۋىنشا، تابيعي قۇبىلىستى الدىن الا بولجاۋ مۇمكىن بولماعان.
6 قىركۇيەكتە بەزەنگي شاتقالىنداعى ميجيرگي تاۋى ماڭىندا قار-مۇز وپىرىلىپ، وقۋ-جاتتىعۋ جيىنىنا قاتىسىپ جاتقان الپينيستەردى باسىپ قالعان. الدىن الا مالىمەت بويىنشا، وقيعا كەزىندە 33 ادام بولعان. ولاردىڭ 10-ى وزدىگىنەن قۇتىلسا، التى ادام ءتۇرلى جاراقاتپەن اۋرۋحاناعا جەتكىزىلگەن. 11 الپينيست قازا تاپتى، تاعى التى ادامنىڭ تاعدىرى ازىرگە بەلگىسىز. ولاردى ىزدەۋ جۇمىستارى جالعاسىپ جاتىر.
الەكساندر ياكوۆەنكو بۇل وقيعانى كادىمگى قار كوشكىنى دەپ اتاۋعا بولمايتىنىن ايتتى. ونىڭ سوزىنشە، تاۋدان قارمەن بىرگە ءىرى مۇز بولىكتەرى دە وپىرىلىپ تۇسكەن.
«بۇل قار كوشكىنى ەمەس، قار-مۇز وپىرىلۋى بولدى. تاۋدان ۇلكەن كولەمدەگى مۇز بەن قار ءتۇسىپ، وقۋ-جاتتىعۋ وتكىزىپ جاتقان توپتى باسىپ قالدى»، – دەدى ساراپشى.
ونىڭ ايتۋىنشا، الپينيستەر شامامەن 3,5 مىڭ مەتر بيىكتىكتەگى مۇزدى ۋچاسكەدە جوسپارلى جاتتىعۋ جۇرگىزگەن. ولار تاۋعا كوتەرىلۋ بارىسىندا ەمەس، مۇزدى جەر بەدەرىندە قوزعالۋ جانە ساقتاندىرۋ تەحنيكاسىن پىسىقتاعان. جاتتىعۋ وتەتىن اۋماقتا ۋاقىتشا شاتىرلى لاگەر دە ورنالاسقان.
ياكوۆەنكو بۇل ورىننىڭ الپينيستەر تۇراقتى تۇردە جاتتىعۋ وتكىزەتىن اۋماق ەكەنىن اتاپ ءوتتى. ونىڭ پىكىرىنشە، اپاتتىڭ اۋقىمى سونشالىق، قار مەن مۇز ماسساسى لاگەرگە دەيىن جەتكەن.
قۇتقارۋ جۇمىستارىنا رەسەي توتەنشە جاعدايلار مينيسترلىگىنىڭ ەلبرۋس بيىك تاۋلى ىزدەۋ-قۇتقارۋ جاساعى، قاراشاي-شەركەسيادان كەلگەن قۇتقارۋشىلار جانە كاباردين-بالكاريانىڭ ءورت ءسوندىرۋ-قۇتقارۋ قىزمەتى جۇمىلدىرىلعان. قۇتقارۋشىلار توبىنىڭ سانى 56 ادامعا دەيىن جەتكىزىلدى.
