يران اسكەرى ورمۋز بۇعازىندا تەگەران بەلگىلەگەن كەمە قاتىناسى تالاپتارىن بۇزعان بىرنەشە كەمەگە سوققى جاساعان. بۇل تۋرالى يراننىڭ IRIB تەلەارناسى جاريالادى، دەپ حابارلايدى “ادىرنا”.
يران بيلىگىنىڭ مالىمەتىنشە، دجاسك پەن كەشم اۋداندارىندا ەستىلگەن جارىلىس دىبىستارى دا وسى شابۋىلدارعا بايلانىستى. تەگەران اتالعان اۋماقتا جەكە جارىلىستار بولماعانىن مالىمدەدى.
«بۇل اۋداندارداعى دىبىستار ورمۋز بۇعازى ارقىلى ءوتۋ ەرەجەلەرىن بۇزعان كەمەلەرگە جاسالعان سوققىلاردان تۋىندادى. اتالعان وڭىردە ەشقانداي جارىلىس بولعان جوق»، — دەلىنگەن حابارلامادا.
«حاتام ءال-انبيا» ورتالىق شتابى اقش قارۋلى كۇشتەرىنە ەسكەرتۋ جاسادى.
«قاۋىپسىزدىك تالاپتارىن بۇزۋ، يران كەمەلەرىنىڭ قوزعالىسىنا كەدەرگى كەلتىرۋ جانە تەڭىز بلوكاداسىن جالعاستىرۋ جاعدايىندا يران قارۋلى كۇشتەرىنىڭ وڭىردەگى امەريكالىق اسكەري كەمەلەرگە جاسايتىن سوققىلارى بۇدان دا كۇشەيىپ، اۋقىمى كەڭەيەدى»، — دەلىنگەن مالىمدەمەدە.
ەسكە سالايىق، بۇعان دەيىن اقش قارۋلى كۇشتەرىنىڭ ورتالىق قولباسشىلىعى (CENTCOM) يراننىڭ ءۇش تانكەرىنە سوققى جاساعان بولاتىن. اقش تاراپى بۇل ارەكەتتى يران يسلام رەۆوليۋتسياسى ساقشىلار كورپۋسىنىڭ (يرسك) وڭىردەگى امەريكالىق كەمەلەرگە سوققى جاساۋ ارەكەتىمەن بايلانىستىرعان.
