الماتى وبلىسىندا دەنە شىنىقتىرۋ ءپانىنىڭ مۇعالىمى وقۋشىنى سىنىپ الدىندا سوگىپ، كەيىن شاشىنان ۇستاپ، يىعىنا سوققى جاساعان، دەپ حابارلايدى "ادىرنا" ۇلتتىق پورتالى كتك-عا سىلتەپ.
وقيعا وقۋشىلاردىڭ ءتۇسىرىپ العان ۆيدەوسى ارقىلى الەۋمەتتىك جەلىدە كەڭىنەن تاراپ، قوعامدىق رەزونانس تۋدىردى.
بەلگىلى بولعانداي، جاعداي قاراساي اۋدانىنا قاراستى قولاشى اۋىلىنداعى مەكتەپتەردىڭ بىرىندە ورىن العان. كۋاگەرلەردىڭ ايتۋىنشا، مۇعالىم الدىمەن وقۋشىعا اۋىزشا ەسكەرتۋ جاساپ، جۇرت الدىندا سوككەن. كەيىن ونىڭ قۇلاعىن بۇراپ، شاشىنان سۇيرەپ، يىعىنا جۇدىرىقپەن سوققى جاساعانى بەينەجازبادا انىق كورىنەدى.
وقۋشىنىڭ اتا-اناسى وقيعا بويىنشا پوليتسياعا ارىز ءتۇسىرىپ، پەداگوگ ءوز كىناسىن مويىنداپ، جازباشا تۇسىنىكتەمە بەرگەن. قازىرگى تاڭدا جانجالدىڭ ناقتى نەدەن شىققانى ازىرگە ناقتىلانباعان.
وبلىستىق ءبىلىم باسقارماسىنىڭ مالىمەتىنشە، اتالعان مۇعالىم جۇمىستان شىعارىلعان.
ال مەديتسينالىق تەكسەرىس قورىتىندىسى بويىنشا وقۋشىنىڭ دەنساۋلىعىنا ايتارلىقتاي زيان كەلمەگەنى انىقتالدى.
جينالعان ماتەريالدار قاراساي اۋداندىق پوليتسيا بولىمىنە جولدانىپ، قر قىلمىستىق كودەكسىنىڭ 140-بابىنىڭ 2-بولىگى — «كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ» بويىنشا قىلمىستىق ءىس قوزعالدى. قازىر تەرگەۋ امالدارى جۇرگىزىلىپ جاتىر.
