پرەزيدەنت قاسىم-جومارت توقاەۆ ايبەك دادەبايدى قۇرىلتاي توراعاسى قىزمەتىنە ۇسىندى. بۇل تۋرالى ول قازاقستان رەسپۋبليكاسى قۇرىلتايىنىڭ ءبىرىنشى شاقىرىلىمىنىڭ العاشقى سەسسياسىندا ايتتى، دەپ حابارلايدى “ادىرنا”.
«جوعارىدا اتاپ ءوتتىم، جاڭا كونستيتۋتسياعا سايكەس بيلىك ينستيتۋتتارىن جاساقتاۋ جۇمىسىن باستاۋ ءۇشىن ءبىز بىرقاتار ءراسىمدى وتكىزۋىمىز كەرەك.
ەڭ الدىمەن، قۇرىلتايدىڭ باسشىلىق قۇرامىن سايلاپ، قۇرىلىمىن قالىپتاستىرۋ قاجەت. وزدەرىڭىزگە ءمالىم، كونستيتۋتسيانىڭ 57-بابىنا سايكەس قۇرىلتاي توراعاسىنىڭ لاۋازىمىنا كانديداتۋرانى پرەزيدەنت ۇسىنادى.
مەن جاۋاپكەرشىلىگى زور بۇل لاۋازىمعا ايبەك ارقابايۇلى دادەبايدىڭ كانديداتۋراسىن ۇسىنامىن”، - دەدى توقاەۆ.
سونداي-اق، مەملەكەت باسشىسى قۇرىلتاي دەپۋتاتتارىنان ايبەك دادەبايدىڭ كانديداتۋراسىن قولداۋدى سۇرادى.
«سىزدەر بۇل تۇلعانى جاقسى بىلەسىزدەر. ول مەملەكەتتىك باسقارۋ جۇيەسىندە كوپ جىل قىزمەت ەتتى. تاجىريبەسى مول دەپ ايتۋعا بولادى. ءوزىنىڭ ءبىلىمدى، وتانشىل، ادال ازامات ەكەنىن ناقتى ىستەرىمەن دالەلدەدى.
سوندىقتان ونى وسى لاۋازىمعا لايىق دەپ سانايمىن. قۇرىلتاي دەپۋتاتتارىنان ايبەك ارقابايۇلى دادەبايدىڭ كانديداتۋراسىن قولداۋدى سۇرايمىن»، - دەدى توقاەۆ.
ايبەك دادەباي 1980 جىلى 1 ساۋىردە الماتى قالاسىندا دۇنيەگە كەلگەن.
2001 جىلى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىن بىتىرگەن. 2003 جىلى ماگيستراتۋرانى اياقتاپ، ايماقتانۋ ماماندىعى بويىنشا ماگيستر دارەجەسىن العان.
ەڭبەك جولىن 2001–2002 جىلدارى قازاق حالىقارالىق قاتىناستار جانە الەم تىلدەرى مەملەكەتتىك ۋنيۆەرسيتەتىندە حالىقارالىق تۋريزم مەنەدجمەنتى كافەدراسىنىڭ وقىتۋشىسى بولىپ باستاعان.
2008–2011 جىلدارى قازاقستان رەسپۋبليكاسى پارلامەنتى سەناتى اپپاراتىنىڭ حالىقارالىق ىنتىماقتاستىق جانە پارلامەنتارالىق بايلانىستار ءبولىمىنىڭ ساراپشىسى، سەنات توراعاسىنىڭ كومەكشىسىنىڭ مىندەتىن اتقارۋشى قىزمەتتەرىن اتقارعان.
2011–2013 جىلدارى جەنەۆا قالاسىنداعى بۇۇ جانىنداعى قازاقستان رەسپۋبليكاسىنىڭ تۇراقتى وكىلدىگىندە اتتاشە جانە ءۇشىنشى حاتشى قىزمەتىن اتقارعان.
2013–2019 جىلدارى سەنات توراعاسى حاتشىلىعىنىڭ ورىنباسارى، كەيىن باسشىسى بولدى.
2019–2021 جىلدارى قازاقستان رەسپۋبليكاسى پرەزيدەنتى كەڭسەسى باسشىسىنىڭ ورىنباسارى قىزمەتىن اتقارعان.
2021 جىلعى مامىردان 2022 جىلعى قاڭتارعا دەيىن پرەزيدەنت ءىس باسقارۋشىسىنىڭ ورىنباسارى بولدى.
2022 جىلعى قاڭتاردا قازاقستان رەسپۋبليكاسى پرەزيدەنتى ءىس باسقارۋشىسى بولىپ تاعايىندالدى.
2024 جىلعى 6 اقپاندا مەملەكەت باسشىسىنىڭ جارلىعىمەن قازاقستان رەسپۋبليكاسى پرەزيدەنتى اكىمشىلىگىنىڭ باسشىسى لاۋازىمىنا تاعايىندالعان بولاتىن.
سونداي-اق، ول "ادىلەت" پارتياسىنىڭ توراعاسى بولدى.
ايتا كەتەيىك، بۇعان دەيىن قۇرىلتاي توراعاسى كىم بولۋى مۇمكىن ەكەنىن ساياسي ورتادا تالقىلاپ، بولجاعان ەدىك.
