Prezident Qasym-Jomart Toqaev Aibek Dädebaidy Qūryltai töraǧasy qyzmetıne ūsyndy. Būl turaly ol Qazaqstan Respublikasy Qūryltaiynyŋ bırınşı şaqyrylymynyŋ alǧaşqy sessiiasynda aitty, dep habarlaidy “Adyrna”.
«Joǧaryda atap öttım, jaŋa Konstitusiiaǧa säikes bilık instituttaryn jasaqtau jūmysyn bastau üşın bız bırqatar räsımdı ötkızuımız kerek.
Eŋ aldymen, Qūryltaidyŋ basşylyq qūramyn sailap, qūrylymyn qalyptastyru qajet. Özderıŋızge mälım, Konstitusiianyŋ 57-babyna säikes Qūryltai Töraǧasynyŋ lauazymyna kandidaturany Prezident ūsynady.
Men jauapkerşılıgı zor būl lauazymǧa Aibek Arqabaiūly Dädebaidyŋ kandidaturasyn ūsynamyn”, - dedı Toqaev.
Sondai-aq, Memleket basşysy Qūryltai deputattarynan Aibek Dädebaidyŋ kandidaturasyn qoldaudy sūrady.
«Sızder būl tūlǧany jaqsy bılesızder. Ol memlekettık basqaru jüiesınde köp jyl qyzmet ettı. Täjıribesı mol dep aituǧa bolady. Özınıŋ bılımdı, otanşyl, adal azamat ekenın naqty ısterımen däleldedı.
Sondyqtan ony osy lauazymǧa laiyq dep sanaimyn. Qūryltai deputattarynan Aibek Arqabaiūly Dädebaidyŋ kandidaturasyn qoldaudy sūraimyn», - dedı Toqaev.
Aibek Dädebai 1980 jyly 1 säuırde Almaty qalasynda düniege kelgen.
2001 jyly Abylai han atyndaǧy Qazaq halyqaralyq qatynastar jäne älem tılderı universitetın bıtırgen. 2003 jyly magistraturany aiaqtap, aimaqtanu mamandyǧy boiynşa magistr därejesın alǧan.
Eŋbek jolyn 2001–2002 jyldary Qazaq halyqaralyq qatynastar jäne älem tılderı memlekettık universitetınde halyqaralyq turizm menedjmentı kafedrasynyŋ oqytuşysy bolyp bastaǧan.
2008–2011 jyldary Qazaqstan Respublikasy Parlamentı Senaty Apparatynyŋ halyqaralyq yntymaqtastyq jäne parlamentaralyq bailanystar bölımınıŋ sarapşysy, Senat Töraǧasynyŋ kömekşısınıŋ mındetın atqaruşy qyzmetterın atqarǧan.
2011–2013 jyldary Jeneva qalasyndaǧy BŪŪ janyndaǧy Qazaqstan Respublikasynyŋ Tūraqty ökıldıgınde attaşe jäne üşınşı hatşy qyzmetın atqarǧan.
2013–2019 jyldary Senat Töraǧasy hatşylyǧynyŋ orynbasary, keiın basşysy boldy.
2019–2021 jyldary Qazaqstan Respublikasy Prezidentı Keŋsesı basşysynyŋ orynbasary qyzmetın atqarǧan.
2021 jylǧy mamyrdan 2022 jylǧy qaŋtarǧa deiın Prezident Is basqaruşysynyŋ orynbasary boldy.
2022 jylǧy qaŋtarda Qazaqstan Respublikasy Prezidentı Is basqaruşysy bolyp taǧaiyndaldy.
2024 jylǧy 6 aqpanda Memleket basşysynyŋ Jarlyǧymen Qazaqstan Respublikasy Prezidentı Äkımşılıgınıŋ Basşysy lauazymyna taǧaiyndalǧan bolatyn.
Sondai-aq, ol "Ädılet" partiiasynyŋ töraǧasy boldy.
Aita keteiık, būǧan deiın Qūryltai töraǧasy kım boluy mümkın ekenın saiasi ortada talqylap, boljaǧan edık.
