الماتىدا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «ادىلەتتى قوعامعا – شىنشىل ءسوز» اتتى جاڭا كىتابىن تالقىلاۋعا ارنالعان دوڭگەلەك ۇستەل ءوتتى. ءىس-شارا دوستىق ۇيىندە ۇيىمداستىرىلىپ، وعان عىلىم، ادەبيەت جانە مەملەكەتتىك قىزمەت سالالارىنىڭ كورنەكتى وكىلدەرى قاتىستى.
ساراپتامالىق كەزدەسۋدى الماتى قالاسى اكىمىنىڭ ورىنباسارى، ساياسي عىلىمدار كانديداتى ابزال نۇكەنوۆ جۇرگىزدى. جيىندى اشقان ول پرەزيدەنت ەڭبەگىنىڭ ايرىقشا قۇندىلىعىنا توقتالىپ، مەملەكەت باسشىسىنىڭ ىشكى جانە سىرتقى ساياسات سالاسىنداعى تەرەڭ تاجىريبەسى كىتاپتا باياندالعان ءاربىر تۇجىرىمعا ەرەكشە سالماق بەرەتىنىن اتاپ ءوتتى. اكىم ورىنباسارىنىڭ ايتۋىنشا، كىتاپتا باسقارۋ ىسىندە تۋىندايتىن كوپتەگەن وزەكتى ماسەلەلەرگە جاۋاپ بەرىلگەن جانە ماڭىزدى شەشىمدەر قابىلداۋدا سەنىمدى باعدار بولا الادى. سونداي-اق ول بۇل ەڭبەكتى زەردەلەۋ مەملەكەتتىك رەفورمالاردىڭ لوگيكاسى مەن ەلدىڭ تاريحي دامۋ جولىن تەرەڭىرەك تۇسىنۋگە مۇمكىندىك بەرەتىنىن اتاپ ءوتتى.
ءسوزىنىڭ سوڭىندا اكىم ورىنباسارى نەگىزگى ويدى بىلايشا تۇيىندەدى.
– بۇل سوزدەردى كىتاپ بەتتەرىندەگى ءماتىن كۇيىندە عانا قالدىرماۋىمىز كەرەك دەپ ەسەپتەيمىن. ولاردى ءتۇرلى سالالاردا ءىس جۇزىندە قولدانۋ ماڭىزدى. بۇل ويلار بارلىق جاستاعى ادامدارعا، اسىرەسە جاستارىمىز بەن ماماندارىمىزعا باعدار بولا الادى. سونداي-اق اتالعان ەڭبەكتىڭ جوعارى قولدانبالىق ماڭىزىن، ونى تاجىريبەدە قولدانۋدىڭ ەرەكشە قۇندىلىعىن اتاپ وتكەن ءجون.
تالقىلاۋدى بەلگىلى مەملەكەت جانە قوعام قايراتكەرى، قازاقستان جازۋشىلار وداعىنىڭ مۇشەسى نۇرلان ورازالين جالعاستىردى. ول ءوز سوزىندە ساياسي كوشباسشىنىڭ حالىق تاعدىرى مەن قوعامعا دەگەن كوزقاراسىنىڭ قالىپتاسۋى مەن ەۆوليۋتسياسى تۋرالى وي-پىكىرلەرىمەن ءبولىسىپ، مۇراعاتتاردا ساقتالعان تاريحي وقيعالاردى دا ەسكە الدى.
– كىتاپتان بولاشاق ەل كوشباسشىسىنىڭ تالىمگەرلىك پەن وتكەن جىلدارداعى وقيعالار ارقىلى قاتاڭ قاعيداتتار مەن تاريحي تاجىريبەنى بويىنا سىڭىرگەنىن كورۋگە بولادى. بۇل ۇدەرىس ونىڭ قىتايداعى قىزمەت ەتكەن كەزىنەن باستاۋ الادى.
1995 جىلى «ەگەمەن قازاقستان» گازەتىندە رەداكتور بولىپ جۇمىس ىستەگەن كەزىمدى ەسكە الا وتىرىپ، قاسىم-جومارت توقاەۆتىڭ جاۋاپكەرشىلىگىنىڭ جوعارى بولعانىن اتاپ وتكىم كەلەدى. دەموكراتيا قالىپتاسىپ جاتقان كەزەڭدە سىرتقى ىستەر ءمينيسترى قىزمەتىنە كەلگەن ول مەنىڭ وتىنىشىمە بىردەن قۇلاق اسىپ، گازەتىمىزگە ارنالعان باعدارلامالىق ماقالانى جەدەل دايىنداپ بەرگەن ەدى، – دەپ ەستەلىگىمەن ءبولىستى نۇرلان ورازالين.
دوڭگەلەك ۇستەل اياسىنداعى پىكىرتالاستا كەزدەسۋگە قاتىسقان باسقا دا بەدەلدى تۇلعالار ءسوز سويلەدى. ولاردىڭ قاتارىندا اكادەميك زەينەپ بازارباەۆا، قازاقستانداعى پەن-كلۋب پرەزيدەنتى بيگەلدى عابدۋللين، احمەت بايتۇرسىنۇلى اتىنداعى ءتىل ءبىلىمى ينستيتۋتىنىڭ ديرەكتورى انار فازىلجان جانە باسقا دا ساراپشىلار بولدى.
ەسكە سالايىق، 5 تامىزدا مەملەكەت باسشىسىنىڭ 1994 جىلدان بۇگىنگى كۇنگە دەيىنگى سويلەگەن سوزدەرى، باياندامالارى مەن وي-تولعاۋلارى قامتىلعان اۋقىمدى جيناق جارىق كوردى. كىتاپ 21 بولىمنەن تۇرادى. وندا مەملەكەتتىك باسقارۋ، زاڭ ۇستەمدىگى، تسيفرلاندىرۋ، جاستار ساياساتى، ەكولوگيا جانە «تازا قازاقستان» باستاماسى سياقتى ماڭىزدى تاقىرىپتار قامتىلعان. ەڭبەك قازىرگى قازاقستان تاريحىنا قىزىعۋشىلىق تانىتاتىن قالىڭ وقىرمانعا ارنالعان.
