Almatyda Qazaqstan Respublikasynyŋ Prezidentı Qasym-Jomart Toqaevtyŋ «Ädılettı qoǧamǧa – şynşyl söz» atty jaŋa kıtabyn talqylauǧa arnalǧan döŋgelek üstel öttı. Is-şara Dostyq üiınde ūiymdastyrylyp, oǧan ǧylym, ädebiet jäne memlekettık qyzmet salalarynyŋ körnektı ökılderı qatysty.
Saraptamalyq kezdesudı Almaty qalasy äkımınıŋ orynbasary, saiasi ǧylymdar kandidaty Abzal Nükenov jürgızdı. Jiyndy aşqan ol Prezident eŋbegınıŋ airyqşa qūndylyǧyna toqtalyp, Memleket basşysynyŋ ışkı jäne syrtqy saiasat salasyndaǧy tereŋ täjıribesı kıtapta baiandalǧan ärbır tūjyrymǧa erekşe salmaq beretının atap öttı. Äkım orynbasarynyŋ aituynşa, kıtapta basqaru ısınde tuyndaityn köptegen özektı mäselelerge jauap berılgen jäne maŋyzdy şeşımder qabyldauda senımdı baǧdar bola alady. Sondai-aq ol būl eŋbektı zerdeleu memlekettık reformalardyŋ logikasy men eldıŋ tarihi damu jolyn tereŋırek tüsınuge mümkındık beretının atap öttı.
Sözınıŋ soŋynda äkım orynbasary negızgı oidy bylaişa tüiındedı.
– Būl sözderdı kıtap betterındegı mätın küiınde ǧana qaldyrmauymyz kerek dep esepteimın. Olardy türlı salalarda ıs jüzınde qoldanu maŋyzdy. Būl oilar barlyq jastaǧy adamdarǧa, äsırese jastarymyz ben mamandarymyzǧa baǧdar bola alady. Sondai-aq atalǧan eŋbektıŋ joǧary qoldanbalyq maŋyzyn, ony täjıribede qoldanudyŋ erekşe qūndylyǧyn atap ötken jön.
Talqylaudy belgılı memleket jäne qoǧam qairatkerı, Qazaqstan Jazuşylar odaǧynyŋ müşesı Nūrlan Orazalin jalǧastyrdy. Ol öz sözınde saiasi köşbasşynyŋ halyq taǧdyry men qoǧamǧa degen közqarasynyŋ qalyptasuy men evoliusiiasy turaly oi-pıkırlerımen bölısıp, mūraǧattarda saqtalǧan tarihi oqiǧalardy da eske aldy.
– Kıtaptan bolaşaq el köşbasşysynyŋ tälımgerlık pen ötken jyldardaǧy oqiǧalar arqyly qataŋ qaǧidattar men tarihi täjıribenı boiyna sıŋırgenın köruge bolady. Būl üderıs onyŋ Qytaidaǧy qyzmet etken kezınen bastau alady.
1995 jyly «Egemen Qazaqstan» gazetınde redaktor bolyp jūmys ıstegen kezımdı eske ala otyryp, Qasym-Jomart Toqaevtyŋ jauapkerşılıgınıŋ joǧary bolǧanyn atap ötkım keledı. Demokratiia qalyptasyp jatqan kezeŋde Syrtqy ıster ministrı qyzmetıne kelgen ol menıŋ ötınışıme bırden qūlaq asyp, gazetımızge arnalǧan baǧdarlamalyq maqalany jedel daiyndap bergen edı, – dep estelıgımen bölıstı Nūrlan Orazalin.
Döŋgelek üstel aiasyndaǧy pıkırtalasta kezdesuge qatysqan basqa da bedeldı tūlǧalar söz söiledı. Olardyŋ qatarynda akademik Zeinep Bazarbaeva, Qazaqstandaǧy PEN-klub prezidentı Bigeldı Ǧabdullin, Ahmet Baitūrsynūly atyndaǧy Tıl bılımı institutynyŋ direktory Anar Fazyljan jäne basqa da sarapşylar boldy.
Eske salaiyq, 5 tamyzda Memleket basşysynyŋ 1994 jyldan bügıngı künge deiıngı söilegen sözderı, baiandamalary men oi-tolǧaulary qamtylǧan auqymdy jinaq jaryq kördı. Kıtap 21 bölımnen tūrady. Onda memlekettık basqaru, zaŋ üstemdıgı, sifrlandyru, jastar saiasaty, ekologiia jäne «Taza Qazaqstan» bastamasy siiaqty maŋyzdy taqyryptar qamtylǧan. Eŋbek qazırgı Qazaqstan tarihyna qyzyǧuşylyq tanytatyn qalyŋ oqyrmanǧa arnalǧan.
