فوتو جي كومەگىمەن جاسالدى
جاڭا زەلانديا ۇكىمەتى 16 جاسقا تولماعان بالالار مەن جاسوسپىرىمدەردىڭ الەۋمەتتىك جەلى قولدانۋىنا تىيىم سالۋدى كوزدەيتىن زاڭ جوباسىن ۇسىنۋى مۇمكىن، دەپ حابارلايدى "ادىرنا" ۇلتتىق پورتالى Reuters-كە سىلتەپ.
زاڭ جوباسى قابىلدانسا، الەۋمەتتىك جەلى پلاتفورمالارى پايدالانۋشىلاردىڭ جاسىن تەكسەرۋگە مىندەتتەلەدى. ول ءۇشىن بەت-الپەتتى تانۋ تەحنولوگياسى نەمەسە تسيفرلىق قۇجاتتار ارقىلى اككاۋنت يەسىنىڭ جاسى راستالۋى مۇمكىن.
شەكتەۋ TikTok, Instagram, Facebook جانە Snapchat سەكىلدى پلاتفورمالارعا قاتىستى بولۋى ىقتيمال. سونىمەن قاتار الەۋمەتتىك جەلى كومپانيالارى جاسوسپىرىمدەرگە تونەتىن قاۋىپتەردى باعالاپ، ونىڭ الدىن الۋ شارالارىن قابىلداۋعا جانە ۇكىمەتكە ەسەپ بەرۋگە ءتيىس بولادى. تالاپتاردى ورىنداماعان كومپانيالارعا ايىپپۇل سالۋ كوزدەلگەن. ال بالالاردىڭ وزىنە، اتا-انالارىنا نەمەسە قامقورشىلارىنا جازا قولدانۋ جوسپارلانباعان.
جاڭا زەلانديا پرەمەر-ءمينيسترى كريستوفەر لاكسوننىڭ ايتۋىنشا، الەۋمەتتىك جەلىلەر بالالاردى زياندى كونتەنتكە تاۋەلدى ەتىپ، ولار دايىن ەمەس قىسىمعا ۇشىراتىپ وتىر.
ۇكىمەت دەرەگىنە سايكەس، ەلدەگى 13-17 جاستاعى ءاربىر ءۇشىنشى جاس الەۋمەتتىك جەلىدە كۇنىنە كەمىندە بەس ساعات وتكىزەدى. الايدا زاڭ جوباسىنىڭ قابىلدانۋى ازىرگە بەلگىسىز. بيلىكتەگى كەيبىر ساياسي كۇشتەر الەۋمەتتىك جەلىگە تولىق تىيىم سالۋ جاڭا ماسەلەلەرگە اكەلۋى مۇمكىن دەپ ەسەپتەيدى.
