فوتو: Stephanie Lecocq / Getty Images
ۋكراينا پرەزيدەنتى ۆلاديمير زەلەنسكي حالىقارالىق قاۋىمداستىقتى بىرىگىپ، رەسەيدى ۋكرايناداعى سوعىستى توقتاتۋعا ءماجبۇر ەتۋگە شاقىردى. ول بۇل تۋرالى ۋكراينانىڭ تاۋەلسىزدىك كۇنىنە وراي حالىققا جاساعان ۇندەۋىندە ايتتى, دەپ حابارلايدى "ادىرنا".
زەلەنسكيدىڭ سوزىنشە، ۋكراينا، ەۋروپا، اقش جانە جالپى حالىقارالىق قاۋىمداستىق رەسەيگە قارسى ءبىر ۇستانىمدا بولۋى قاجەت. پرەزيدەنت كيەۆتىڭ سوعىس جاعدايىندا قارسىلىعىن جالعاستىراتىنىن اتاپ ءوتتى.
«ۋكراينا مۇنى جاسايدى. ۋكراينا بۇعان دەيىن دە باستاپقىدا ەڭسەرىلمەيتىندەي كورىنگەن مىندەتتەردى شەشتى»، – دەدى ول.
ۋكراينا پرەزيدەنتى رەسەي پرەزيدەنتى ۆلاديمير ءپۋتيننىڭ ۋكرايناعا قاتىستى جوسپارلارىندا باستى فاكتوردى ەسكەرمەگەنىن مالىمدەدى. ونىڭ ايتۋىنشا، رەسەي ۋكرايناداعى اسكەري رەسۋرستاردى، تەحنيكا مەن قويمالاردى ەسەپتەگەنىمەن، حالىقتىڭ ەلدىڭ تاۋەلسىزدىگىن قورعاۋداعى ءرولىن باعالاماعان.
زەلەنسكي ۋكراين قوعامىنىڭ توزىمدىلىگى مەن قارسىلىق كورسەتۋ قابىلەتى رەسەيدىڭ ەسەپتەۋلەرىن وزگەرتكەنىن ايتتى.
سونىمەن قاتار ول سوعىس بارىسىندا رەسەيدىڭ بىرقاتار شىعىنعا ۇشىراعانىن اتاپ ءوتتى. زەلەنسكي مۇناي وڭدەۋ زاۋىتتارى، اسكەري-تەڭىز فلوتى مەن ەكونوميكالىق رەسۋرستارعا كەلتىرىلگەن زالالعا توقتالىپ، رەسەيدىڭ سوعىس سالدارىنان ادام شىعىنىنا دا نازار اۋداردى.
ۋكراينا باسشىسى قازىرگى جاعدايدىڭ كۇردەلى ەكەنىن مويىنداعانىمەن، دونەتسك وبلىسىن رەسەيگە بەرۋ ارقىلى سوعىستى اياقتاۋ ۇسىنىسىنا كەلىسپەيتىنىن تاعى دا ءبىلدىردى. ونىڭ پىكىرىنشە، ۋكراينانىڭ اۋماقتىق تۇتاستىعىنان باس تارتۋ سوعىستى توقتاتۋدىڭ كەپىلى بولا المايدى.
ء«بىز ولارعا باستامانى قولعا الۋعا، ەۋروپا مەن بۇكىل الەمدى دونباسستى بەرۋ ارقىلى ءبارى اياقتالادى دەپ سەندىرۋگە جول بەرمەيمىز»، – دەدى زەلەنسكي.
پرەزيدەنت سوزىندە قىتايدىڭ دا ۇستانىمىنا توقتالدى. ول بەيجىڭدى ۋكرايناداعى سوعىستى توقتاتۋعا بەلسەندى تۇردە ىقپال ەتۋگە شاقىردى.
زەلەنسكي قىتاي الەمدىك كوشباسشى رەتىندەگى ءرولىن تەك ەكونوميكا مەن تەحنولوگيا سالاسىندا عانا ەمەس، حالىقارالىق قاۋىپسىزدىك ماسەلەلەرىندە دە كورسەتۋى كەرەك دەپ سانايدى.
«قىتاي ەندى ءۇنسىز قالماۋى كەرەك»، – دەدى ۋكراينا پرەزيدەنتى.
سونىمەن قاتار زەلەنسكي ۋكراينانىڭ قورعانىس ونەركاسىبى مەن اسكەري الەۋەتىن كۇشەيتۋ قاجەت ەكەنىن ايتتى. ونىڭ سوزىنشە، ەلدىڭ قارۋلى كۇشتەرىن نىعايتۋ جانە قورعانىسقا قاجەتتى قۇرالدارمەن قامتاماسىز ەتۋ جالعاسا بەرەدى.
اقش-تىڭ ۇستانىمىن باعالادى
زەلەنسكي اقش پرەزيدەنتى دونالد ترامپ اكىمشىلىگىنىڭ رەسەيگە قاتىستى ساياساتىن دا جوعارى باعالادى. ونىڭ ايتۋىنشا، ۆاشينگتون ماسكەۋدىڭ سوعىستى شىن مانىندە اياقتاعىسى كەلەتىنىنە قاتىستى بۇرىنعى تۇسىنىكتەرىن قايتا قاراعان.
ۋكراينا پرەزيدەنتى اقش پەن ەۋروپا ەلدەرى رەسەيدى كەلىسسوز ۇستەلىنە وتىرۋعا ءماجبۇر ەتۋ ءۇشىن قىسىمدى كۇشەيتىپ، جاڭا سانكتسيالار ەنگىزۋى قاجەت دەگەن پىكىر ءبىلدىردى.
