ورمۇز بۇعازىنان ءوتۋ ەرەجەسىن بۇزعان كەمەلەردىڭ بۇدان بىلاي بۇعاز ارقىلى وتۋىنە شەكتەۋ قويىلادى. ولارعا ايىپپۇل سالىنۋى، ۇستالۋ جانە ءتىپتى تاركىلەنۋى مۇمكىن. بۇل تۋرالى 23 تامىزدا يراننىڭ پارسى شىعاناعى بۇعازى اكىمشىلىگى (PGSA) ايتتى، دەپ حابارلايدى «ادىرنا» ءتىلشىسى.
حابارلامادا بۇدان ءارى پارسى شىعاناعى اكۆاتورياسىنا نەمەسە ودان تىس باعىتتا جۇك تاسىمالدايتىن جۇك جونەلتۋشىلەرگە كەمە جالداماس بۇرىن ىقتيمال ماسەلەلەردىڭ الدىن الۋ ءۇشىن ءتيىستى سايتتاعى تالاپتاردى ساقتاماعان كەمەلەردىڭ تىزىمىمەن تانىسۋ قاجەت ەكەنى ايتىلعان.
19 تامىزدا Axios باسىلىمى اقش قارۋلى كۇشتەرى كەمەلەردىڭ ورمۇز بۇعازى ارقىلى وتۋىنە ارنالعان قۇپيا تەڭىز باعىتىن ازىرلەگەنىن حابارلاعان ەدى. بۇل باعىت ارقىلى تاۋلىگىنە ميلليونداعان باررەل مۇناي تاسىمالداۋعا بولادى.
باسىلىمنىڭ مالىمەتىنشە، ومان جاعالاۋىنداعى وڭتۇستىك ارنا ارقىلى ءار ءتۇن سايىن 15-20 تانكەر ءوتىپ، الەمدىك نارىققا شامامەن 10 ملن باررەل مۇناي جەتكىزەدى. بۇل سوعىسقا دەيىنگى كولەمنىڭ شامامەن جارتىسىنا تەڭ. اقش پرەزيدەنتى دونالد ترامپ اكىمشىلىگىنىڭ وكىلدەرى بۇل جەتكىزىلىمدەردىڭ الەمدىك مۇناي نارىعىنا «ايتارلىقتاي ىقپال» ەتىپ وتىرعانىن مالىمدەگەن.
بۇعان دەيىن اقش پرەزيدەنتى دونالد ترامپ يرانعا قارسى اۋقىمدى ەكونوميكالىق سوعىس باستالعانىن جاريالاعان ەدى. ول تەگەراندى قولدايتىن نەمەسە ونىمەن بيزنەس جۇرگىزەتىن كەز كەلگەن ەلگە سانكتسيالار سالىناتىنىن ەسكەرتكەن. سونداي-اق ترامپ قازىرگى ۋاقىتتا ۆاشينگتوننىڭ تەگەرانمەن كەلىسسوز جۇرگىزىپ جاتپاعانىن اتاپ ءوتتى.
