جەتىسۋ وبلىسىنىڭ تۇرعىندارى سايلاۋ ۋچاسكەلەرىنە توپتاسىپ كەلىپ، قۇرىلتاي سايلاۋىنا داۋىس بەرىپ جاتىر.
وسىلايشا ءوڭىر حالقى ءوزىنىڭ ازاماتتىق بەلسەندىلىگىن تانىتىپ، ەل بولاشاعىنا جاۋاپكەرشىلىكپەن قارايتىنىن كورسەتۋدە. سايلاۋدا العاشقىلاردىڭ ءبىرى بولىپ وبلىس اكىمى بەيبىت يساباەۆ تا ءوز تاڭداۋىن جاسادى.
ماسەلەن، الاكول اۋدانىنىڭ قاينار اۋىلىندا ق.سقاقۇلى، ءى.جانسۇگىروۆ، م.مامەتوۆا، ب. مومىشۇلى كوشەلەرىنىڭ 40 تۇرعىنى سايلاۋ ۋچاسكەسىنە ءبىر مەزگىلدە بارىپ، داۋىس بەردى. سول سياقتى ء«بىر كوشە – ءبىر داۋىس» باستاماسىنا تەكەلى قالاسىنداعى ءال-فارابي كوشەسىنىڭ 50-گە جۋىق تۇرعىنى دا بەلسەنە قاتىسىپ، №452 سايلاۋ ۋچاسكەسىنە بىرگە كەلدى. سونداي-اق سارقان اۋدانىنىڭ شاتىرباي اۋىلىندا تۇراتىن 50 ازامات بىرلىگىن تانىتىپ، ازاماتتىق بەلسەندىلىك بايقاتتى.
اقسۋ اۋدانىنىڭ 16 اۋىلدىق وكرۋگىندە ءبىر مەزگىلدە 500 ادام تاڭداۋ جاسادى. سولاردىڭ ءبىرى جانسۇگىروۆ اۋىلىنىڭ تۇرعىنى بەيبىت تۇراربايۇلى پىكىر ءبىلدىردى:
- ءبىز ءبىر اۋىلدىڭ تۇرعىندارى رەتىندە بىرگە كەلدىك، ارقايسىمىز ءوز تاڭداۋىمىزدى جاسادىق. ەڭ باستىسى – تۇڭعىش رەت ءوتىپ جاتقان قۇرىلتاي سايلاۋىنا بەلسەندى قاتىسىپ، ءوز داۋىسىمىزدى بەرۋ ارقىلى ەلدىڭ ورتاق بولاشاعىنا ۇلەس قوستىق، – دەدى ول.
سول قاتاردا ەسكەلدى اۋدانىنىڭ تۇرعىندارى دا بەلسەندىلىك تانىتۋدا. مىسالى، الدابەرگەنوۆ اۋىلىنداعى سايلاۋ ۋچاسكەسىنە 300-گە جۋىق تۇرعىن ۇيىمداسقان تۇردە كەلسە، كوكجازىق اۋىلىنىڭ 100-گە جۋىق تۇرعىنى دا تاڭەرتەڭنەن بەلسەندىلىك تانىتىپ، №102 سايلاۋ ۋچاسكەسىندە داۋىس بەردى.
– ءبىز ازاماتتىق ۇستانىمىمىزدى كورسەتۋ ماڭىزدى دەپ ساناپ، ارنايى بىرگە كەلدىك. قۇرىلتاي جۇمىسىندا اۋىل تۇرعىندارىنىڭ مۇددەسى ەسكەرىلگەنىن قالايمىز. ينفراقۇرىلىمدى دامىتۋ، اۋىل شارۋاشىلىعىن قولداۋ، جۇمىس ورىندارىن اشۋ، جاستارعا مۇمكىندىك جاساۋ سياقتى ماسەلەلەر اۋىلدارىمىزدىڭ تۇرمىس-تىرشىلىگىنە تىكەلەي اسەر ەتەدى، – دەيدى داۋىس بەرۋگە كەلگەن ايتجامال جۇماباەۆا.
اتاپ وتسەك، وبلىستاعى سايلاۋشىلاردىڭ جالپى سانى 443 220 ادام، ونىڭ 5 503-ءى العاش رەت داۋىس بەرەدى. وڭىردە 468 سايلاۋ ۋچاسكەسى بار، ولار تاڭعى ساعات 7.00-دەن 20.00-گە دەيىن جۇمىس ىستەيدى
