قازاقستان كاسپي تەڭىزىندەگى مۇناي-گاز نىساندارىنىڭ تەرروريزمگە قارسى قورعالۋىن كۇشەيتەدى. بۇل تۋرالى ەنەرگەتيكا مينيسترلىگى جازدى، دەپ حابارلايدى «ادىرنا» ءتىلشىسى.
قۇجاتقا سايكەس، كاسپي تەڭىزىنىڭ قازاقستان سەكتورىندا جۇمىس ىستەيتىن مۇناي-گاز كومپانيالارى جەدەل شتابتىڭ سۇراۋى بويىنشا وندىرىستىك نىساندارعا جاقىن جەردەن ونىڭ قىزمەتكەرلەرى مەن تەحنيكاسىن ورنالاستىرۋعا ارنالعان الاڭ ۇسىنۋعا مىندەتتى.
جەدەل شتابتىڭ قىزمەتىنە بايلانىستى شىعىنداردى جەر قويناۋىن پايدالانۋشىلار وتەيدى. شىعىنداردىڭ تىزبەسى مەن كولەمىن، سونداي-اق تولەم جانە وتەماقى ءتارتىبىن تاراپتار ءوزارا كەلىسىم بويىنشا ايقىندايدى.
قۇجاتتا شتاب كۇشتەرىن ورنالاستىراتىن ورىنعا قويىلاتىن تالاپتار دا بەلگىلەنگەن. الاڭ كەمىندە 10 قىزمەتكەردى ورنالاستىرۋعا ەسەپتەلىپ، تىكۇشاق الاڭىنا يە بولۋى جانە تەڭىزدەگى وندىرىستىك نىسانداردان 23 شاقىرىمنان اسپايتىن قاشىقتىقتا ورنالاسۋى ءتيىس.
بۇيرىق قۇجات جاريالانعان كۇننەن كەيىن ەكى اي وتكەن سوڭ، ياعني 17 قازاندا كۇشىنە ەنەدى.
ەنەرگەتيكا مينيسترلىگىنىڭ بۇل بۇيرىعى كاسپي تەڭىزىندە ۋكراينا تاراپىنان جاسالعان شابۋىلدار اياسىندا جاريالاندى. اتاپ ايتقاندا، شىلدە ايىنىڭ سوڭىندا يران كەمەلەرىنىڭ ءبىرى شابۋىلعا ۇشىراعان ەدى. ۋكراينا تاراپى كاسپيدەگى شابۋىلعا ۇشىراعان كەمەلەر اسكەري جۇكتەر تاسىمالداعانىن مالىمدەگەن. تەگەران بۇل وقيعانى اگرەسسيا اكتىسى دەپ اتاپ، كيەۆتىڭ يرانعا قاتىستى ۇستانىمىن قيسىنسىز ءارى دۇشپاندىق سيپاتتا دەپ باعالاعان بولاتىن.
بۇعان دەيىن رەسەيدە دە وسىنداي شارالار قابىلدانعان. 2026 جىلدىڭ مامىرىندا رەسەي پرەزيدەنتى ۆلاديمير پۋتين كاسپي تەڭىزىنىڭ رەسەي سەكتورىنداعى تەڭىزدەگى مۇناي-گاز نىساندارىن قورعاۋ تۋرالى زاڭعا قول قويعان. قۇجات ەنەرگەتيكالىق نىسانداردىڭ اينالاسىندا ەنى 500 مەترگە دەيىنگى قاۋىپسىزدىك ايماقتارىن قۇرۋدى كوزدەيدى.
