ءماجىلىستىڭ بۇرىنعى دەپۋتاتى باقىتجان بازاربەك جامبىل وبلىسىندا بولعان جول-كولىك وقيعاسىنا بايلانىستى پىكىر ءبىلدىردى. ول الەۋمەتتىك جەلىلەردە تاراعان ءتۇرلى اقپارات پەن بولجامدارعا ازىرگە تۇسىنىكتەمە بەرە المايتىنىن ايتىپ، وقيعا بويىنشا تەرگەۋ ءجۇرىپ جاتقانىن جەتكىزدى، دەپ حابارلايدى "ادىرنا".
بۇرىنعى دەپۋتاتتىڭ ايتۋىنشا، ءوزى مەن جۇبايى تەرگەۋ قۇپياسىن ساقتاۋعا قاتىستى قولحات بەرگەن. قازىر قىلمىستىق ءىس اياسىندا قاجەتتى ساراپتامالار جۇرگىزىلىپ جاتىر.
بازاربەك الەۋمەتتىك جەلىلەردە وقيعاعا قاتىستى ءتۇرلى نۇسقالار مەن راستالماعان اقپاراتتاردىڭ تاراعانىن اتاپ ءوتتى. ونىڭ سوزىنشە، تەرگەۋ اياقتالمايىنشا وقيعانىڭ ءمان-جايىنا قاتىستى ناقتى پىكىر ايتۋعا مۇمكىندىگى جوق.
ول قۇقىق قورعاۋ ورگاندارى جول اپاتىنىڭ بارلىق ءمان-جايىنا زاڭ اياسىندا وبەكتيۆتى باعا بەرەتىنىنە سەنىم ءبىلدىردى.
«بارشاڭىزدى اسىعىس قورىتىندى جاساماۋعا جانە تەك رەسمي اقپارات پەن تەرگەۋ ناتيجەلەرىنە سەنۋگە شاقىرامىن»، – دەپ جازدى باقىتجان بازاربەك.
ەكس-دەپۋتات قازىرگى تاڭدا باستى نازار زارداپ شەككەن ازاماتتىڭ دەنساۋلىعىنا اۋدارىلىپ وتىرعانىن ايتتى. ونىڭ مالىمدەۋىنشە، ءوزى جانە جاقىندارى جاراقات العان ازاماتتىڭ تەزىرەك ساۋىعىپ كەتۋىن تىلەپ وتىر.
سونداي-اق ول زارداپ شەككەن ادامعا العاشقى مەديتسينالىق كومەك كورسەتكەن اۋداندىق اۋرۋحانا دارىگەرلەرىنە، دەنساۋلىق ساقتاۋ مينيسترلىگىنە جانە وبلىستىق دەنساۋلىق ساقتاۋ باسقارماسىنا العىسىن ءبىلدىردى.
بۇعان دەيىن بىرقاتار اقپارات قۇرالدارىندا جامبىل وبلىسىنداعى جول اپاتىنا باقىتجان بازاربەكتىڭ قاتىسى بارى تۋرالى اقپارات تاراعان. الايدا پوليتسيا كولىكتى ناقتى كىم باسقارعانىن ازىرگە رەسمي تۇردە جاريالاعان جوق.
وبلىستىق پوليتسيا دەپارتامەنتىنىڭ مالىمەتىنشە، الدىن الا اقپارات بويىنشا، Toyota اۆتوكولىگىنىڭ جۇرگىزۋشىسى، ب. ەسىمدى ازامات جولدىڭ ءجۇرىس بولىگىندە تۇرعان ەر ادامدى قاعىپ كەتكەن. جول-كولىك وقيعاسى سالدارىنان ەر ادام اۋرۋحانانىڭ جانساقتاۋ بولىمىنە جەتكىزىلگەن.
وقيعاعا قاتىستى قىلمىستىق ءىس قوزعالىپ، تەرگەۋ امالدارى جالعاسىپ جاتىر.
