Parsy şyǧanaǧyndaǧy İranǧa tiesılı Hark aralynyŋ batys terminaly 25 kündık tolyq toqtaudan keiın qaita ıske qosyldy. Būl turaly Tasnim agenttıgı jazdy, dep habarlaidy «Adyrna» tılşısı.
Sputniktık suretter ūzyndyǧy şamamen 333 metr bolatyn VLCC sanatyndaǧy mūnai tankerınıŋ terminalǧa kelıp, şikı mūnai tieuge kırıskenın körsetedı. Keme 11 şıldeden berı kütu aimaǧynda zäkırde tūrǧan. Endı ol ailaqqa kelıp toqtap, şikı mūnai tieu jūmystaryn bastaǧan.
Hark araly – İrannyŋ mūnai eksportyndaǧy strategiialyq maŋyzy asa joǧary nysandardyŋ bırı. BAQ mälımetınşe, eldıŋ mūnai eksportynyŋ şamamen 90 paiyzy osy araldaǧy terminaldar arqyly jüzege asyrylady. Tereŋ sudaǧy ailaqtar älemdegı eŋ ırı tankerlerdı qabyldauǧa mümkındık beredı.
Agenttık sondai-aq Keşm jäne Lark araldary maŋynda jük kemelerı men mūnai tankerlerınıŋ qozǧalysy küşeigenın habarlady. Sputniktık suretterde atalǧan audanda 35 mūnai tankerı men jük kemesı tırkelgen.
Būdan bölek, öŋırde 36 jyldam jüretın kater baiqalǧan. Sarapşylardyŋ pıkırınşe, olar kemelerdı alyp jüru nemese patruldık qyzmet atqaruy mümkın.
