فوتو: ۋيكيپەديا
وزبەكستان يراننىڭ ارمەنياداعى ەلشىلىگى سامارقاندتى «پارسى وركەنيەتى مەن ساۋلەتىنىڭ ءبىر بولىگى» دەپ سيپاتتاعان جاريالانىمىنا بايلانىستى نارازىلىق ءبىلدىردى. 23 قازاندا وزبەكستان سىرتقى ىستەر مينيسترلىگى يران ەلشىسى مۇحامماد ءالي يسكانداريدى شاقىرىپ، وعان رەسمي نارازىلىق نوتاسىن تاپسىردى. بۇل تۋرالى وزبەكستان ءسىم حابارلادى, دەپ جازادى “ادىرنا”.
ديپلوماتيالىق نارازىلىققا يراننىڭ ارمەنياداعى ەلشىلىگىنىڭ X الەۋمەتتىك جەلىسىندە جاريالاعان جازباسى سەبەپ بولعان. وندا اقش مەملەكەتتىك حاتشىسى ماركو رۋبيونىڭ سامارقاندقا ساپارى تۋرالى حابارلاماعا تۇسىنىكتەمە بەرىلىپ، قالا «پارسى وركەنيەتى مەن ساۋلەتىنىڭ ءبىر بولىگى» رەتىندە سيپاتتالعان.
وزبەكستاننىڭ سىرتقى ساياسي ۆەدومستۆوسى مۇنداي تۇجىرىم سامارقاندتىڭ تاريحي-مادەني مۇراسىن بىرجاقتى تۇسىندىرەدى جانە ونى ساياسي ماقساتتا پايدالانۋعا جول اشادى دەپ سانايدى.
مينيسترلىك مالىمدەمەسىندە سامارقاند، بۇحارا، حيۋا جانە باسقا دا تاريحي قالالاردىڭ وزبەكستاننىڭ عاسىرلار بويى قالىپتاسقان مادەني مۇراسىنىڭ اجىراماس بولىگى ەكەنى اتاپ ءوتىلدى. سونداي-اق سامارقاندتىڭ ساۋلەتتىك كەلبەتى وزبەك حالقىنىڭ تاريحىن، مەملەكەتتىلىك داستۇرلەرى مەن مادەني دامۋىن بەينەلەيتىنى ايتىلدى.
وسىعان بايلانىستى وزبەكستان تاراپى ديپلوماتيالىق وكىلدىكتەردىڭ الەۋمەتتىك جەلىلەردەگى پاراقشالارىنان داۋلى جاريالانىمداردى ءوشىرۋدى جانە مۇنداي جاعدايلاردىڭ قايتالانباۋى ءۇشىن ءتيىستى شارالار قابىلداۋدى تالاپ ەتتى.
سونىمەن بىرگە وزبەكستان ءسىم يرانمەن ءوزارا قۇرمەت پەن سەنىمگە نەگىزدەلگەن قارىم-قاتىناستى باعالايتىنىن مالىمدەدى. الايدا تاريحي-مادەني مۇراعا قاتىستى ماسەلەلەردە ەلدىڭ ۇلتتىق ۇستانىمى تاباندى تۇردە قورعالاتىنىن جەتكىزدى.
