قازاقستان حالىق پارتياسى يۋتۋب ارناسىندا استانادا قىزمەت كەزىندە قازا تاپقان ۇلدانا مىرزۋاننىڭ بۇرىنعى جۇبايى ادىلەت زەينەل مەن ونىڭ اناسىنىڭ سۇحباتىن جاريالادى، دەپ حابارلايدى "ادىرنا" ۇلتتىق پورتالى.
پودكاست بارىسىندا جۇرگىزۋشى قوعامدا ادىلەت زەينەلدىڭ قايتا ۇيلەنۋىنە قاتىستى ءتۇرلى پىكىرلەر ايتىلىپ جاتقانىن، كوپشىلىك ونىڭ مارقۇم جۇبايىنىڭ قازاسىنان كەيىن ءبىر جىل كۇتپەگەنىن سىنعا العانىن اتاپ ءوتتى.
ادىلەت زەينەلدىڭ اناسى مۇنداي پىكىرلەرگە جاۋاپ بەرىپ، زاڭنامادا بەلگىلى ءبىر مەرزىم وتكەننەن كەيىن عانا قايتا وتباسىن قۇرۋ قاجەت دەگەن تالاپ جوق ەكەنىن ايتتى.
«ەشقانداي زاڭدا جارتى جىل نەمەسە ءبىر جىل كۇتۋ كەرەك دەپ جازىلماعان. مەن ءوز بالامنىڭ كۇلگەنىن، ەكىنشى جارتىسىن تاپقانىن قالادىم. تۇندە ۇيىقتاماي، ءوز بالاڭ وزىنە بىردەڭە ىستەپ قويا ما دەپ الاڭداپ جۇرەتىنمىن. كىم نە دەسە دە، مەن بالامنىڭ ءتىرى، امان، باقىتتى بولعانىن قالايمىن. ول ءبارى ءۇشىن ەر ازامات شىعار، ال مەن ءۇشىن ءومىر بويى بالا بولىپ قالا بەرەدى»، – دەدى ەلزا ەرمانوۆا.
سونداي-اق، سۇحبات بارىسىندا حالىق سۇراعان 20 ملن تەڭگە وتەماقىنىڭ دا قايدا جۇمسالعانىن ايتتى.
"ول اقشاعا ۇلدانانىڭ كولىگىنىڭ نەسيەسىن جاپتىق. ول شامامەن 10 ملن تەڭگە بولدى. قالعان سومما ونىڭ ۇزاتۋىنا الىنعان نەسيەنى تولەۋگە كەتتى. مەن بارلىق ەسەپتەردى اكەلدىم", - دەدى ول.
ەسكە سالايىق، ۇلدانا مىرزۋان مەن رەابيليتولوگ-دارىگەر ادىلەت زەينەل 2025 جىلعى 30 قىركۇيەكتە شاڭىراق كوتەرگەن. ەرلى-زايىپتى بۇعان دەيىن سەگىز جىل بويى قارىم-قاتىناستا بولعان.
2025 جىلعى 8 قاراشادا استانادا توعىز قاباتتى تۇرعىن ءۇيدىڭ سىرتقى كىرپىش قاپتاماسى قۇلاپ، بىرنەشە ادام ءۇيىندى استىندا قالعان. وقيعا ورنىنا كەلگەن جەدەل جاردەم بريگاداسىنىڭ قۇرامىندا بولعان فەلدشەر ۇلدانا مىرزۋان قۇتقارۋ جۇمىستارى كەزىندە ۇستىنە قۇلاعان كونديتسيونەر قۇرىلعىسىنان اۋىر جاراقات العان. وقيعا سالدارىنان بەس ادام زارداپ شەكتى. ۇلدانا مىرزۋان 10 كۇن بويى جانساقتاۋ بولىمىندە ەم قابىلداعانىمەن، دارىگەرلەر ونىڭ ءومىرىن ساقتاپ قالا المادى. ول 2025 جىلعى 18 قاراشادا 23 جاسىندا قايتىس بولدى. سول كۇنى مەملەكەت باسشىسى قاسىم-جومارت توقاەۆ ونى «ەرلىگى ءۇشىن» مەدالىمەن ماراپاتتادى.
ال ارادا سەگىز اي وتكەن سوڭ ادىلەت زەينەلدىڭ باسقا بويجەتكەنگە ۇيلەنگەنى تۋرالى اقپارات تاراپ، قوعام نازارىن اۋدارعان.
