قازاقستان مۇنايىنىڭ باسىم بولىگى ەكسپورتتالاتىن كاسپي قۇبىر كونسورتسيۋمى ارقىلى مۇناي تيەۋ جۇمىستارى قايتادان ۇزىلىسپەن جۇرگىزىلىپ جاتىر، دەپ حابارلايدى "ادىرنا" ءتىلشىسى Reuters-كە سىلتەپ.
بۇعان قارا تەڭىزدەگى تەرمينال ماڭىندا ۇشقىشسىز ۇشۋ اپپاراتتارىنىڭ شابۋىلدارى مەن تانكەرلەردىڭ جەتىسپەۋى سەبەپ بولعان.
اگەنتتىك مالىمەتىنشە، سوڭعى تاۋلىكتە كقك تەرمينالىنىڭ جۇمىسى ەكى رەت توقتاپ، كەيىن قايتا جالعاسقان. الايدا 5 تامىز كۇنى تاڭەرتەڭ مۇناي تيەۋ تاعى دا ۋاقىتشا توقتاتىلدى. بەيرەسمي دەرەككوزدەردىڭ ايتۋىنشا، مۇناي جونەلتۋ كەستەسى كۇن سايىن وزگەرىپ جاتىر. كەيبىر پارتيالار جوسپارعا ەنگىزىلگەنىمەن، تانكەر تابىلماعاندىقتان ۋاقىتىندا جونەلتىلمەيدى. جاعدايدىڭ قيىنداۋىنا كوپتەگەن كەمە كومپانيالارىنىڭ قاۋىپسىزدىككە بايلانىستى تانكەرلەرىن قارا تەڭىزگە جىبەرۋدەن باس تارتۋى اسەر ەتىپ وتىر.
ساراپشىلاردىڭ ايتۋىنشا، بۇل جاعداي مۇناي باعاسىنا دا ىقپال ەتكەن. قازاقستاننىڭ CPC Blend ماركالى مۇنايى بۇرىن Brent باعاسىنان قىمبات ساتىلسا، قازىر كەرىسىنشە ارزانداپ كەتكەن. بۇعان جەتكىزۋ مەرزىمىنىڭ كەشىگۋى مەن تاسىمال قۇنىنىڭ قىمباتتاۋى سەبەپ.
قازىر قازاقستان ەكسپورتتايتىن مۇنايدىڭ 80 پايىزدان استامى كقك ارقىلى تاسىمالدانادى. بۇل قۇبىرمەن تەڭىز، قاشاعان جانە قاراشىعاناق كەن ورىندارىنىڭ مۇنايى الەمدىك نارىققا شىعارىلادى. بالاما باعىتتار بولعانىمەن، ولاردىڭ وتكىزۋ مۇمكىندىگى شەكتەۋلى.
بۇعان دەيىن ەنەرگەتيكا مينيسترلىگى كقك جۇمىسى تولىق توقتامايتىنىن حابارلاعان. الايدا شىلدە ايىندا ورىن العان قيىندىقتار سالدارىنان قازاقستانداعى مۇناي ءوندىرىسى ماۋسىم ايىمەن سالىستىرعاندا شامامەن 14 پايىزعا ازايدى. وسىعان بايلانىستى «تەڭىزشەۆرويل» كومپانياسى تامىز ايىندا مۇنايدىڭ ءبىر بولىگىن تەمىرجول ارقىلى گرۋزيانىڭ باتۋمي پورتىنا جەتكىزۋدى جوسپارلاپ وتىر.
