دۇنيەجۇزىلىك ساياحات جانە تۋريزم كەڭەسىنىڭ (WTTC) 2025 جىلعى ەسەبىنە سايكەس، ورتالىق ازيا الەمدەگى ەڭ جىلدام دامىپ كەلە جاتقان تۋريستىك ءوڭىر رەتىندە تانىلدى. ساراپشىلاردىڭ مالىمەتىنشە، وڭىردەگى تۋريستىك سالانىڭ ەكونوميكاعا قوسقان ۇلەسى ءبىر جىل ىشىندە 17,7%-عا ءوسىپ، 20,1 ملرد اقش دوللارىنا جەتكەن.
بۇل كورسەتكىش سولتۇستىك-شىعىس ازياداعى 8,7% جانە وڭتۇستىك-شىعىس ازياداعى 7,6% ءوسىم قارقىنىنان ايتارلىقتاي جوعارى. WTTC وڭىردەگى تۋريزم يندۋسترياسىنىڭ تۇراقتى تۇردە دامىپ كەلە جاتقانىن اتاپ ءوتتى.
ەسەپكە سايكەس، 2025 جىلى ورتالىق ازيادا تۋريستەردىڭ جالپى شىعىنى 15,4 ملرد اقش دوللارىن قۇراعان. ونىڭ ىشىندە 9,9 ملرد دوللاردى شەتەلدىك تۋريستەردىڭ شىعىنى قۇراسا، 5,5 ملرد دوللار ىشكى تۋريزمگە تيەسىلى بولعان.
سونىمەن قاتار، قازىرگى تاڭدا ءوڭىردىڭ تۋريستىك سالاسى 1,7 ميلليون ادامدى جۇمىسپەن قامتىپ وتىر. بۇل كورسەتكىش ءتۋريزمنىڭ ورتالىق ازيا ەلدەرىنىڭ ەكونوميكاسىنداعى ءرولىنىڭ ارتىپ كەلە جاتقانىن كورسەتەدى.
مامانداردىڭ پىكىرىنشە، وڭىرگە قىزىعۋشىلىقتىڭ ارتۋىنا تۋريستىك ينفراقۇرىلىمنىڭ جاقسارۋى، حالىقارالىق اۋە قاتىناستارىنىڭ كەڭەيۋى جانە تاريحي-مادەني باعىتتاردىڭ تانىمال بولۋى ىقپال ەتكەن.
ايتا كەتەيىك، بۇعان دەيىن دە حالىقارالىق ۇيىمدار ورتالىق ازيانىڭ تۋريزم سالاسى قارقىندى دامىپ كەلە جاتقان وڭىرلەردىڭ ءبىرى ەكەنىن مالىمدەگەن بولاتىن.
