ۆەتنام قازاقستاننىڭ تۋريستىك سالاسىنا ينۆەستيتسيا كولەمىن ارتتىرۋدا. الماتى وبلىسىندا ورنالاسقان Ak Bulak Village تۋريستىك كەشەنىنىڭ قۇرىلىسى ۆەتنامدىق ينۆەستورلاردىڭ قاتىسۋىمەن جۇزەگە اسىرىلماق. بۇل تۋرالى قر ۇلتتىق ەكونوميكا مينيسترلىگى قازاقستان پرەمەر-ءمينيسترىنىڭ ورىنباسارى سەرىك جۇمانعارين مەن ۆەتنام پرەمەر-ءمينيسترىنىڭ ورىنباسارى نگۋەن حوا بين اراسىنداعى كەزدەسۋدە ايتىلدى، دەپ حابارلايدى “ادىرنا”.
مينيسترلىكتىڭ مالىمەتىنشە، قازاقستان مەن ۆەتنام اراسىنداعى ينۆەستيتسيالىق ىنتىماقتاستىق جاڭا كەزەڭگە شىقتى. قازىرگى ۋاقىتتا ەلىمىزدە ۆەتنامدىق كاپيتالدىڭ قاتىسۋىمەن بىرنەشە جوبا ىسكە اسىرىلىپ جاتىر. ولاردىڭ قاتارىندا الماتى وبلىسىنداعى Ak Bulak Village تۋريستىك كەشەنىنىڭ قۇرىلىسى جانە قوناەۆ قالاسىنداعى «ارنا» يندۋستريالىق ايماعىندا 90 ملن اقش دوللارى كولەمىندەگى ينۆەستيتسيامەن ازىق-تۇلىك ونىمدەرىن وندىرەتىن زاۋىت سالۋ جوباسى بار.
بۇعان دەيىن بۇقارالىق اقپارات قۇرالدارى الماتى وبلىسىنداعى بيىك تاۋلى «اق-بۇلاق» كۋرورتىن ۆەتنامدىق Crystal Bay Group كومپانياسىمەن بىرلەسىپ، ەليتالىق تۋريستىك ورتالىققا اينالدىرۋ جوسپارلانىپ وتىرعانىن حابارلاعان بولاتىن. جوبا اياسىندا كۋرورت اۋماعىندا كازينوسى بار ايماق قۇرۋ كوزدەلگەن.
وسى ماقساتتا ءوڭىر اكىمدىگى جاڭا ويىن ايماعىنىڭ شەكاراسىن بەلگىلەۋ جۇمىستارىن جۇرگىزىپ جاتىر. سونىمەن قاتار، 2025 جىلدىڭ قاراشا ايىندا «اق-بۇلاق» تۋريستىك ورتالىعىن شەتەل ازاماتتارى ءۇشىن قۇمار ويىندارعا رۇقسات ەتىلگەن اۋماقتار تىزىمىنە ەنگىزۋدى كوزدەيتىن زاڭ جوباسى قاراستىرىلعان.
2022 جىلدىڭ تامىز ايىندا سول كەزدەگى سىرتقى ىستەر ءمينيسترى مۇحتار تىلەۋبەردى ۆەتنامعا رەسمي ساپارى بارىسىندا قازاقستانعا ينۆەستيتسيا سالۋعا مۇددەلى بىرقاتار كومپانيا باسشىلارىمەن كەزدەسكەن. سول كەزدەسۋلەردىڭ ءبىرى Crystal Bay Group ديرەكتورلار كەڭەسىنىڭ توراعاسى نگۋەن دىك چيمەن وتكەن. كەزدەسۋ بارىسىندا تۋريزم سالاسىنداعى ىنتىماقتاستىق مۇمكىندىكتەرى تالقىلانعان.
2025 جىلدىڭ مامىر ايىندا الماتى وبلىسىنىڭ اكىمدىگى ۆەتنامدىق Crystal Bay Group جانە «كيپروس» كومپانياسىمەن ىنتىماقتاستىق تۋرالى مەموراندۋمعا قول قويدى. «كيپروس» كومپانياسىنىڭ جالعىز يەسى – كاسىپكەر تيمۋر قۇلىباەۆ. ول Forbes نۇسقاسى بويىنشا 5,3 ملرد اقش دوللارى كولەمىندەگى بايلىعىمەن قازاقستانداعى ەڭ باي ادامداردىڭ العاشقى بەستىگىنە كىرەدى.
مەموراندۋم ىلە الاتاۋىنىڭ ەتەگىندەگى اق-بۇلاق شاتقالىندا زاماناۋي تۋريستىك نىسان سالۋدى كوزدەيدى. قازىرگى تاڭدا بۇل اۋماقتا كۋرورتتىق قوناقۇي، قىسقى ماۋسىمدا ءارتۇرلى دەڭگەيدەگى شاڭعى تراسسالارى، ال جاز مەزگىلىندە اتپەن سەرۋەندەۋ، جاياۋ تۋريستىك باعىتتار جانە وزگە دە دەمالىس تۇرلەرى جۇمىس ىستەيدى.
جاڭا كۋرورت قۇرىلىسىنىڭ جالپى قۇنى 46,5 ملن اقش دوللارىنا باعالانعان. ينۆەستيتسيانىڭ 80 پايىزىن Crystal Bay Group, ال 20 پايىزىن «كيپروس» كومپانياسى قارجىلاندىرادى. جوبا اياسىندا گولف-كلۋب سالۋ، قوناقۇي كەشەنىن كەڭەيتۋ، ساياجاي مەن تاۋنحاۋستار تۇرعىزۋ، سونداي-اق جىل بويى تۋريست قابىلداي الاتىن رەكرەاتسيالىق ايماق قۇرۋ جوسپارلانعان. سونىمەن قاتار، ويىن بيزنەسىنە ارنالعان ارنايى اۋماق تا قاراستىرىلعان.
