فوتو: Reuters
ماروككو بيلىگى يسپانيانىڭ سەۋتا جانە مەليليا انكلاۆتارىنا زاڭسىز ميگرانتتاردىڭ جاپپاي اعىلۋىنا اسەر ەتكەن نەگىزگى سەبەپتەردى اتادى. بۇل تۋرالى Hespress باسىلىمى جازدى، دەپ حابارلايدى "ادىرنا".
ماروككو ىشكى ىستەر مينيسترلىگىنىڭ مالىمەتىنشە، جاعدايدىڭ ۋشىعۋىنا ينتەرنەتتە تاراعان جالعان اقپارات، ادام ساۋداسىمەن اينالىساتىن قىلمىستىق جەلىلەردىڭ ارەكەتى جانە يسپانيا سوتتارىنىڭ سوڭعى شەشىمدەرىنىڭ بۇرمالانىپ ءتۇسىندىرىلۋى سەبەپ بولعان. ۆەدومستۆونىڭ ايتۋىنشا، سوت شەشىمدەرى تۋرالى قاتە اقپارات ەۋروپاعا جەتۋ جەڭىلدەدى ءارى مۇنداي ارەكەتتىڭ قۇقىقتىق سالدارى ماردىمسىز بولادى دەگەن جاڭساق پىكىر قالىپتاستىرعان.
سەۋتاداعى ميگراتسيالىق داعدارىس 30 شىلدەدە باستالدى. سول كۇنى مىڭداعان ماروككو ازاماتى شەكارانى ءجۇزىپ، ۇرلەمەلى شەڭبەرلەر مەن شاعىن قايىقتاردىڭ كومەگىمەن كەسىپ وتە باستاعان. ءبىر جارىم كۇن ىشىندە يسپانيانىڭ سەۋتا قالاسىنا شامامەن 50 مىڭ ادام وتكەن. ال قالا اكىمشىلىگى ولاردىڭ سانىن 60 مىڭعا جۋىق دەپ باعالاعان.
Reuters اگەنتتىگىنىڭ مالىمەتىنشە، يسپانيا اۋماعىنا جەتۋگە ارەكەتتەنگەن ميگرانتتار اراسىندا قازا تاپقاندار سانى 72 ادامعا جەتكەن. ولاردىڭ قاتارىندا شەكارانى ءجۇزىپ وتپەك بولعان 20 جاستاعى «ماگرەب اتلەتيك» فۋتبول كلۋبىنىڭ ويىنشىسى فاتەن بەن امار ءال-ازيز دە بار.
ماروككو ءىىم-ءنىڭ حابارلاۋىنشا، كەي جەرلەردە ماروككو مەن سەۋتا اراسىنداعى قاشىقتىق 70 مەتردەن از، ال سۋدىڭ تەرەڭدىگى ەكى مەتردەن ءسال عانا اسادى. بۇل كوپتەگەن ادامنىڭ شەكارانى كەسىپ ءوتۋ قاۋىپسىز دەگەن قاتە تۇسىنىككە بوي الدىرۋىنا سەبەپ بولعان.
داعدارىسقا بايلانىستى يسپانيا بيلىگى سەۋتاعا اسكەري كۇشتەر جىبەردى. قالا مەرى حۋان حەسۋس ۆيۆاس قالىپتاسقان جاعدايدى گۋمانيتارلىق جانە الەۋمەتتىك اپات دەپ باعالادى. كەيىن يسپانيانىڭ ىشكى ىستەر مينيسترلىگى ەكى ەل زاڭسىز كىرگەن ميگرانتتاردى جەدەل دەپورتاتسيالاۋ جونىندە كەلىسىمگە كەلگەنىن مالىمدەدى.
31 شىلدە كەشىندە يسپانيا ۇكىمەتى ونداعان مىڭ ميگرانتتىڭ قۇرلىقتاعى شەكارا ارقىلى ءوز ەركىمەن ماروككوعا ورالعانىن حابارلادى. يسپانيانىڭ سىرتقى ىستەر ءمينيسترى حوسە مانۋەل البارەستىڭ ايتۋىنشا، سەۋتاداعى ميگراتسيالىق داعدارىس ءىس جۇزىندە ەڭسەرىلگەن.
