قازاقستاندا سۋ ديپلوماتياسى دەپارتامەنتى قۇرىلدى. بۇل تۋرالى سۋ رەسۋرستارى جانە يرريگاتسيا مينيسترلىگى جاريالادى، دەپ حابارلايدى "ادىرنا".
اقپاراتقا سايكەس، زاڭا دەپارتامەنت سۋ ديپلوماتياسى سالاسىنداعى مەملەكەتتىك ساياساتتى دامىتۋ مەن ۇيلەستىرۋگە جاۋاپتى بولادى.
دەپارتامەنت قازاقستاننىڭ ترانسشەكارالىق سۋ رەسۋرستارى ماسەلەلەرى بويىنشا جۇمىسىن ۇيلەستىرەدى: بۇعان حالىقارالىق كوميسسيالارعا قاتىسۋدان باستاپ، كەلىسسوزدەر جۇرگىزۋ مەن وزگە مەملەكەتتەرمەن كەلىسىمدەر جاساسۋعا دەيىنگى مىندەتتەر كىرەدى.
قازاقستاننىڭ باس سۋ ديپلوماتى بولىپ دانيار ءشارىپ تاعايىندالدى.
دانيار ەسەنۇلى ءشارىپ 1992 جىلى الماتى وبلىسىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىن "گيدرولوگيا" ماماندىعى بويىنشا، سونداي-اق كاسپي قوعامدىق ۋنيۆەرسيتەتىن "قۇقىقتانۋ" ماماندىعى بويىنشا تامامداعان.
ەڭبەك جولىن 2015 جىلى اۋىل شارۋاشىلىعى مينيسترلىگى سۋ رەسۋرستارى كوميتەتىنىڭ سۋ شارۋاشىلىعى قۇرىلىستارىن پايدالانۋ جانە دامىتۋ باسقارماسىندا ساراپشى مىندەتىن اتقارۋشى رەتىندە باستاعان. كەيىن ساراپشى جانە باس ساراپشى قىزمەتتەرىن اتقاردى.
2019 جىلى اۋىل شارۋاشىلىعى مينيسترلىگىنىڭ ترانسشەكارالىق وزەندەر دەپارتامەنتى ترانسشەكارالىق وزەندەر باسقارماسىنىڭ باس ساراپشىسى بولدى.
2019-2023 جىلدارى ەكولوگيا، گەولوگيا جانە تابيعي رەسۋرستار مينيسترلىگىنىڭ ترانسشەكارالىق وزەندەر دەپارتامەنتىندە باس ساراپشى، كەيىن ترانسشەكارالىق وزەندەر باسقارماسىنىڭ باسشىسى قىزمەتتەرىن اتقاردى.
2023-2024 جىلدارى قازاقستان رەسپۋبليكاسى ۇكىمەتى اپپاراتىنىڭ باس ينسپەكتورى بولدى.
2024 جىلدان بۇگىنگە دەيىن سۋ رەسۋرستارى جانە يرريگاتسيا مينيسترلىگىنىڭ حالىقارالىق ىنتىماقتاستىق دەپارتامەنتى ديرەكتورىنىڭ ورىنباسارى، كەيىن وسى دەپارتامەنتتىڭ ديرەكتورى قىزمەتىن اتقاردى.
