ۋكراينا پرەزيدەنتى ۆلاديمير زەلەنسكي ۋكراينا قارۋلى كۇشتەرىنىڭ العاش رەت ەكى سولتۇستىك كورەيا اسكەري قىزمەتكەرىن تۇتقىنداعانىن مالىمدەدى، دەپ حابارلايدى "ادىرنا" ۇلتتىق پورتالى Euronews اگەنتتىگىنە سىلتەمە جاساپ.
تۇتقىندار كۋرسك وبلىسىندا ۇستالعان. زەلەنسكيدىڭ ايتۋىنشا، جاراقات العان سولتۇستىككورەيالىق ساربازدارعا كومەك كورسەتىلىپ، ولار كيەۆكە جەتكىزىلگەن. ولار ورىس نەمەسە اعىلشىن تىلىندە سويلەمەگەندىكتەن، ولارمەن سويلەسۋگە اۋدارماشىلاردىڭ كومەگى قاجەت بولعان.
ءبىر ساربازدى ارنايى وپەراتسيا كۇشتەرىنىڭ № 84 توبىنىڭ جاساعى تۇتقىنداعان، ال ەكىنشىسىن ۋكراينالىق دەسانتشىلار ۇستاعان.
«بۇل مىندەت وڭاي بولعان جوق. سەبەبى ادەتتە رەسەي مەن سولتۇستىك كورەيانىڭ باسقا اسكەريلەرى كحدر-ءدىڭ ۋكرايناعا قارسى سوعىسقا قاتىسقانى تۋرالى دالەلدەر ساقتالماۋى ءۇشىن جارالانعاندارىن ولتىرەتىن»، - دەپ مالىمدەدى زەلەنسكي.
اقپاراتتارعا سۇيەنسەك، تۇتقىنداردىڭ بىرىندە رەسەيلىك ۇلگىدەگى اسكەري بيلەت بولعان. وندا تۋۆا رەسپۋبليكاسىندا تىركەلگەن باسقا ءبىر ادامنىڭ اتى-ءجونى جازىلعان. تەكسەرۋ بارىسىندا ول 2005 جىلى تۋعانىن، 2021 جىلدان باستاپ سولتۇستىك كورەيادا قىزمەت ەتكەنىن جانە وقۋ ءۇشىن ەمەس، ۋكرايناعا قارسى سوعىسقا قاتىسۋ ءۇشىن بارعانىن ايتقان.
ەكىنشى تۇتقىندا قۇجات بولماعان. ول 1999 جىلى تۋعان، 2016 جىلدان بەرى سولتۇستىك كورەيانىڭ ارمياسىندا سنايپەر-بارلاۋشى رەتىندە قىزمەت ەتەتىنىن ايتقان.
