رەسەيدەگى جانارماي داعدارىسى قازاقستان ىشىندەگى وتىننىڭ قولجەتىمدىلىگىنە اسەر ەتپەيدى. بۇل تۋرالى ۇكىمەتتەگى بريفينگتە ەنەرگەتيكا ۆيتسە-ءمينيسترى قايىرحان تۇتقىشباەۆ ايتتى، دەپ حابارلايدى «ادىرنا» ءتىلشىسى.
«بۇگىندە قاجەتتى قور مەن وتىن بالانسى قالىپتاستىرىلعان، سوندىقتان قانداي دا ءبىر تاپشىلىق كۇتىلمەيدى. رەسەي – كورشىلەس نارىق، الايدا ءبىزدىڭ ىشكى وندىرىستىك مۇمكىندىكتەرىمىز بەن بولجامدارىمىزدى ەسكەرە وتىرىپ، جانار-جاعارماي تاپشىلىعى بولادى دەپ كۇتپەيمىز»،–دەدى ول.
ۆيتسە-مينيستر قازاقستان رەسەيدەن بەنزين ساتىپ المايتىنىن ەسكە سالىپ، كورشى ەل تاراپىنان وتىن ساتىپ الۋ جونىندە رەسمي ءوتىنىش تۇسپەگەنىن اتاپ ءوتتى. سونىمەن قاتار ول قىرعىزستاننىڭ رەسمي تۇردە ءوتىنىش جولداعانىن جانە قازىرگى ۋاقىتتا بۇل ماسەلە قارالىپ جاتقانىن راستادى.
«مينيسترلىككە ءوتىنىش تۇسكەن جاعدايدا، ءبىز ونى ۇلتتىق مۇددەنى ەسكەرە وتىرىپ جانە ءوزارا ءتيىمدى شارتتار نەگىزىندە قاراستىرامىز»،– دەپ ءتۇسىندىردى تۇتقىشباەۆ.
