الماتى وبلىستىق ءسۇيىنباي اتىنداعى فيلارمونيانىڭ ونەرپازدارى بەلارۋس رەسپۋبليكاسىنىڭ ۆيتەبسك وبلىسى گلىبوكاە قالاسىندا 24-25-ءشى شىلدە كۇندەرى وتكەن حالىقارالىق «شيە» ەتنوفەستيۆالىنە قاتىسىپ، قازاقتىڭ ءتول ونەرىن لايىقتى تانىستىردى.
حالىقارالىق مادەني شارادا فيلارمونيا قۇرامىنداعى «قوبىز سارىنى» فولكلورلى-ەتنوگرافيالىق ءانسامبلى مەن «التىناي» مەملەكەتتىك حالىق بي ءانسامبلى ونەر كورسەتىپ، فەستيۆال قوناقتارىنىڭ ىستىق ىقىلاسىنا بولەندى.
2013 جىلدان بەرى ءداستۇرلى تۇردە ۇيىمداستىرىلىپ كەلە جاتقان «شيە» فەستيۆالىنە قازاقستان، ميانما، رەسەي جانە بەلارۋس رەسپۋبليكاسىنىڭ شىعارماشىلىق ۇجىمدارى قاتىستى. فەستيۆالدىڭ سالتاناتتى اشىلۋ راسىمىندە ۆيتەبسك وبلىستىق دەپۋتاتتار كەڭەسىنىڭ توراعاسى دميتري ۆلاديميروۆيچ دەميدوۆ قاتىسۋشىلارعا ساتتىلىك تىلەدى.
– گلىبوكاە قالاسى – بەلارۋستىڭ شيە استاناسى. شيەلى باقتارى مەن كوركەم كولدەرىنىڭ ورتاسىندا ورنالاسقان شاعىن قالامىزعا قوش كەلدىڭىزدەر! ونەر حالىقتاردى جاقىنداستىرىپ، ءبىر-ءبىرىمىزدىڭ مادەنيەتىمىزدى تەرەڭىرەك تانۋعا مۇمكىندىك بەرەدى. ءبىزدىڭ باستى ماقساتىمىز – ەتنوستار اراسىنداعى دوستىق پەن ءوزارا قۇرمەتتى نىعايتۋ، ۇلتتىق ونەر مەن ءداستۇردىڭ ساباقتاستىعىن ساقتاپ، ونى كەيىنگى ۇرپاققا جەتكىزۋ، – دەدى دميتري دەميدوۆ.
فەستيۆال اياسىندا «قوبىز سارىنى» فولكلورلى-ەتنوگرافيالىق ءانسامبلىنىڭ كوركەمدىك جەتەكشىسى بەكنازار قالەكەەۆ باستاعان سامات قارابالاەۆ، نۇرسۇلتان ەگەمبەردى، ءامينا اقىلبەك، سەرىك جۇماعالي، ايدانا جاكمان سىندى مۋزىكانتتار قازاقتىڭ «اققۋ» جانە «اقىرتاس» كۇيلەرىن ورىنداپ، كورەرمەندەردىڭ زور قوشەمەتىنە يە بولدى.
ال «التىناي» مەملەكەتتىك حالىق بي ءانسامبلىنىڭ جەتەكشىسى بەگزات اعيارۇلى باستاعان بيشىلەر – اسەل كوبەگەن، سىنبات وتەگەنوۆا، اياجان دوسقانوۆا جانە اسەل سەرىكباي ۇلتتىق بيلەردىڭ كوركەم ۇلگىلەرىن ساحنالاپ، فەستيۆالدىڭ قورىتىندى كونتسەرتىندە ورىندالعان «قارا جورعا» بيىمەن جينالعان كوپشىلىكتى ەرەكشە ءتانتى ەتتى.
الماتى وبلىستىق ءسۇيىنباي اتىنداعى فيلارمونيانىڭ ديرەكتورى ءسابيت ابدىحالىقوۆ حالىقارالىق فەستيۆالدىڭ ماڭىزىنا توقتالدى.
– بۇل فەستيۆالدە ءار مەملەكەت ءوزىنىڭ ۇلتتىق مادەنيەتى مەن ونەرىن تانىستىرادى. ءبىز قازاقتىڭ قوبىز ونەرىن جانە سوناۋ 1980-جىلدارى مەملەكەت جانە قوعام قايراتكەرى وزبەكالى جانىبەكوۆتىڭ باستاماسىمەن قۇرىلىپ، ءوزى اتاۋ بەرگەن «التىناي» بي ءانسامبلىن الىپ كەلدىك. وسىنداي حالىقارالىق ونەر مەرەكەلەرى تاجىريبە الماسۋعا، كاسىبي تۇرعىدان شىڭدالۋعا زور مۇمكىندىك بەرەدى. ەڭ باستىسى – قازاق حالقىنىڭ باي مادەنيەتى مەن ونەرىن الەمگە تانىتۋعا قىزمەت ەتەدى. ءبىزدىڭ ۇجىمدى ۇنەمى قولداپ كەلە جاتقان الماتى وبلىسىنىڭ باسشىسى مارات سۇلتانعازيەۆ پەن مادەنيەت باسقارماسىنا العىس بىلدىرەمىز، – دەدى ول.
فەستيۆال بارىسىندا مينسك قالاسىنداعى قازاقستان رەسپۋبليكاسىنىڭ ەلشىلىگىنىڭ كەڭەسشىسى راشيد راۆيلۇلى دا ارنايى قاتىسىپ، الماتى وبلىسىنىڭ ونەرپازدارىنا قولداۋ ءبىلدىردى.
بەلارۋس تورىندە وتكەن حالىقارالىق فەستيۆال قازاق ونەرىنىڭ مەرەيىن ۇستەم ەتىپ، ءسۇيىنباي اتىنداعى فيلارمونيا ۇجىمىنىڭ كاسىبي دەڭگەيى مەن ۇلتتىق مادەنيەتتى حالىقارالىق دەڭگەيدە ناسيحاتتاۋداعى الەۋەتىن تاعى ءبىر مارتە ايقىندادى.
قانات يسا
