كاسپي قۇبىر كونسورتسيۋمىنىڭ تەڭىز تەرمينالىندا مۇناي تيەۋ وپەراتسيالارى ۋاقىتشا توقتاتىلعان سوڭ قازاقستانداعى مۇناي سالاسى تۋرالى اقپارات تارادى، دەپ حابارلايدى "ادىرنا" ۇلتتىق پورتالى.
ەنەرگەتيكا مينيسترلىگىنىڭ حابارلاۋىنشا، قۇبىر جۇيەسىنە مۇناي قابىلداۋعا قويىلعان ۋاقىتشا شەكتەۋلەرگە جانە رەزەرۆۋارلاردىڭ شامادان تىس تولىپ كەتۋىنە جول بەرمەۋ ماقساتىندا مۇناي ءوندىرۋشى كومپانيالار تاۋلىكتىك ءوندىرۋ كولەمىن جوسپارلى تۇردە قىسقارتقان. وسىنىڭ ناتيجەسىندە مۇناي ءوندىرۋ كولەمى ۋاقىتشا تومەندەگەن. مينيسترلىك بۇل تەحنولوگيالىق سيپاتتاعى شارا ەكەنىن جانە ونىڭ وندىرىستىك پروتسەستەردىڭ تۇراقتىلىعىن قامتاماسىز ەتۋگە باعىتتالعانىن حابارلادى.
سونداي-اق ۆەدومستۆو قازىرگى ۋاقىتتا كاسپي قۇبىر كونسورتسيۋمىنىڭ باسشىلىعىمەن، ءىرى جۇك جونەلتۋشىلەرمەن، كەمە يەلەرىمەن جانە سالالىق مەملەكەتتىك ورگاندارمەن تۇراقتى جۇمىس جۇرگىزىلىپ جاتقانىن حابارلادى. مينيسترلىكتىڭ مالىمەتىنشە، تاراپتار كەمە قاتىناسىنىڭ قاۋىپسىزدىگىن قامتاماسىز ەتۋ جانە قازاقستاندىق مۇناي ەكسپورتىن الەمدىك نارىقتارعا مۇمكىندىگىنشە قىسقا مەرزىمدە قالپىنا كەلتىرۋ ماسەلەلەرى بويىنشا ۇزدىكسىز كونسۋلتاتسيالار وتكىزىپ جاتىر.
