فوتو: 24kz
تارازدىق ءداستۇرلى ءانشى، قازاقستاننىڭ ەڭبەك سىڭىرگەن قايراتكەرى باقىت شاعىرباەۆ دۇنيەجۇزىلىك رەكوردتار كىتابىنا ەندى. ونەر يەسى التى ساعات بويى ءبىر ساتكە دە توقتاماي 114 ءان ورىنداپ، وسى ساناتتاعى جاڭا الەمدىك رەكوردتى تىركەدى، دەپ حابارلايدى "ادىرنا".
رەكورد ورناتۋ ءراسىمى تاراز قالاسىندا ءوتتى. ءانشىنى قولداۋعا تىڭدارماندارى، ارىپتەستەرى مەن جاقىندارى جينالدى. باقىت شاعىرباەۆتىڭ ايتۋىنشا، الەمدىك رەكورد ورناتۋ يدەياسى وسىدان ءبىر جىل بۇرىن تۋعان.
ونەرپاز بۇل باستامانىڭ باستى ماقساتى قازاقتىڭ ءداستۇرلى ءان ونەرىن الەمگە تانىتۋ ەكەنىن ايتتى.
"بۇل جاي عانا ونەر دە، جاي عانا بايقاۋ دا ەمەس. بۇل – قازاق حالقىنىڭ ونەرىن الەمنىڭ 200-گە جۋىق ەلىنە تانىتاتىن ۇلكەن مۇمكىندىك. رەپەرتۋارىمدا حالىق تەرمەلەرى، حالىق كومپوزيتورلارىنىڭ اندەرى، حالىق اندەرى بار. سونىمەن قاتار ءشامشى قالداياقوۆتىڭ، اسەت بەيسەۋوۆتىڭ، ءىليا جاقانوۆتىڭ شىعارمالارىن جانە قىرعىز اندەرىن ورىندايمىن. سونىڭ بارلىعى ماعان جىگەر بەرەدى", – دەدى ءانشى.
رەكوردتىق باعدارلاما اياسىندا باقىت شاعىرباەۆ حالىق اندەرى مەن حالىق كومپوزيتورلارىنىڭ شىعارمالارىنان بولەك، قازاقستاندىق اۆتورلاردىڭ تۋىندىلارىن جانە ونعا جۋىق قىرعىز ءانىن ورىندادى. وسىعان دەيىن بۇل ساناتتاعى الەمدىك رەكورد 101 انمەن تىركەلگەن بولاتىن.
Global Best of Records ۇيىمىنىڭ ازيا جانە افريكا ديۆيزيونى بويىنشا رەكوردتاردى تىركەۋ جونىندەگى باس وفيتسەرى قۋاندىق قۇدايبەرگەنوۆتىڭ ايتۋىنشا، باقىت شاعىرباەۆتىڭ ناتيجەسى رەسمي تۇردە الەمدىك رەكورد رەتىندە تىركەلدى.
باقىت شاعىرباەۆ 35 جىلدان بەرى قازاقتىڭ ءداستۇرلى ءان ونەرىن ناسيحاتتاپ كەلەدى. ونىڭ رەپەرتۋارىندا 400-گە جۋىق ءان بار. سونىمەن قاتار ونەرپاز قازاقستاننىڭ 245 اۋىلىندا تەگىن كونتسەرت وتكىزىپ، ۇلتتىق ونەردى دارىپتەپ ءجۇر.
"ەلدى مەكەندەردى، اۋىل-اۋىلدى تەگىن ارالاپ، كونتسەرت بەرىپ ءجۇرمىن. بۇگىنگى كۇنگە دەيىن 245 اۋىلدى ارالادىم. ساحنادا حالىقتىڭ ىستىق ىقىلاسى مەن قوشەمەتىنە بولەنگەندە ۋاقىتتىڭ قالاي وتكەنىن بايقاماي قالامىن. ءبىر اۋىلدان كەيىن ەكىنشىسىنە، ودان كەيىن ۇشىنشىسىنە بارىپ، كۇنىنە ءۇش اۋىلعا دەيىن كونتسەرت قويامىن. بۇل جۇمىسىم الداعى ۋاقىتتا دا جالعاسادى", – دەدى ءانشى.
رەكوردتاردى تىركەۋمەن اينالىساتىن ۇيىم وكىلدەرىنىڭ مالىمەتىنشە، بيىل الەم بويىنشا تىركەلگەن بارلىق رەكورد ارنايى جيناق بولىپ جارىق كورەدى. باسىلىم جەتى تىلگە اۋدارىلىپ، الەمنىڭ 200 ەلىنە تاراتىلادى. سونداي-اق ۇلتتىق كىتاپحانالار قورىنا تەگىن جولدانادى.
