مەملەكەت جانە قوعام قايراتكەرى، تاريح عىلىمدارىنىڭ دوكتورى، جازۋشى دارحان قىدىرالى حالىقارالىق «الاش» ادەبي سىيلىعىمەن ماراپاتتالدى. سالتاناتتى ماراپاتتاۋ ءراسىمى قازاقستان جازۋشىلار وداعىنىڭ عيماراتىندا ءوتتى، دەپ حابارلايدى "ادىرنا".
جيىن بارىسىندا قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ دارحان قىدىرالىنىڭ ۇلتتىق ادەبيەتتانۋ عىلىمىن دامىتۋعا، تۇركى دۇنيەسىنىڭ ورتاق رۋحاني مۇراسىن زەرتتەۋگە جانە قازاق مادەنيەتىن حالىقارالىق دەڭگەيدە ناسيحاتتاۋعا قوسقان ۇلەسىن جوعارى باعالادى.
ونىڭ ايتۋىنشا، دارحان قىدىرالىنىڭ الاش مۇراسى، تۇركى وركەنيەتى، قازاق ادەبيەتىنىڭ تاريحى مەن رۋحاني ساباقتاستىعىنا ارنالعان عىلىمي ەڭبەكتەرى ادەبيەتتانۋ مەن تۇركولوگيا عىلىمىنىڭ دامۋىنا ەلەۋلى ۇلەس قوسقان.
جيىندا اقىن، قازاقستان جازۋشىلار وداعى باسقارماسى توراعاسىنىڭ ورىنباسارى قاسىمحان بەگمانوۆ، فيلولوگيا عىلىمدارىنىڭ دوكتورى قانسەيىت ابدەزۇلى جانە اقىن، «انا ءتىلى» گازەتىنىڭ باس رەداكتورى ەرلان ءجۇنىس ءسوز سويلەپ، دارحان قىدىرالىنىڭ «ەگەمەن قازاقستان» رەسپۋبليكالىق گازەتىنە جەتەكشىلىك ەتكەن كەزەڭدەگى جانە مەملەكەتتىك قىزمەتتەگى ەڭبەگىنە توقتالدى. ولار ونىڭ ۇلتتىق ءباسپاسوزدىڭ دامۋىنا، قوعامدىق پىكىردىڭ قالىپتاسۋىنا جانە ەلدىڭ رۋحاني ومىرىنە قوسقان ۇلەسىن اتاپ ءوتتى.
ءوز كەزەگىندە دارحان قىدىرالى جوعارى ماراپات ءۇشىن قازاقستان جازۋشىلار وداعىنا العىس ءبىلدىرىپ، سوڭعى جىلدارى ۇيىمدا جۇزەگە اسىرىلىپ جاتقان جۇمىستارعا وڭ باعاسىن بەردى. ول جازۋشىلار وداعى عيماراتىندا جۇرگىزىلىپ جاتقان كۇردەلى جوندەۋ جۇمىستارى شىعارماشىلىق ورتاعا جاڭا سەرپىن بەرەتىنىن ايتتى.
سونداي-اق ول ادەبيەت سالاسى بويىنشا نوبەل سىيلىعىنىڭ لاۋرەاتى مو ياننىڭ قازاقستانعا كەلىپ، جازۋشىلار وداعىندا وقىرماندارمەن كەزدەسۋى قازاق ادەبيەتىنىڭ حالىقارالىق بەدەلىن ارتتىرعان ماڭىزدى وقيعا بولعانىن اتاپ ءوتتى.
دارحان قىدىرالى ءسوز بارىسىندا قازاقستان جازۋشىلار وداعى مەن «كىتاپ وقيتىن ۇلت – چيتايۋششايا ناتسيا» قوعامدىق قورى اراسىنداعى ىنتىماقتاستىق تۋرالى مەموراندۋمعا دا توقتالىپ، مۇنداي باستامالار كىتاپ وقۋ مادەنيەتىن دامىتۋعا، جاستاردىڭ ادەبيەتكە قىزىعۋشىلىعىن ارتتىرۋعا جانە زەردەلى ۇلت قالىپتاستىرۋعا ىقپال ەتەتىنىن ايتتى.
