پاۆلودار وبلىسىنىڭ ۋسپەن اۋدانىندا قاتتى جەل سالدارىنان ەلەكتر جەلىلەرى مەن تۇرعىن ۇيلەرگە زاقىم كەلدى، دەپ حابارلايدى "ادىرنا" ۇلتتىق پورتالى.
بۇل تۋرالى اۋدان اكىمدىگى حابارلادى.
اكىمدىكتىڭ مالىمەتىنشە، 21 شىلدە كۇنى ساعات 15:55-تە قوڭىروزەك اۋىلدىق وكرۋگىنە قاراستى قوڭىروزەك، چيستوپول، ۆوزنەسەنكا جانە ناداروۆكا اۋىلدارىندا 10 كۆ اۋە ەلەكتر جەلىسىنىڭ جەتى باعاناسى زاقىمدانعان. قازىر اپاتتىق-قالپىنا كەلتىرۋ جۇمىستارىن اۋداندىق ەلەكتر جەلىلەرى قىزمەتى جۇرگىزىپ جاتىر. جۇمىسقا 10 مامان مەن ءۇش ارنايى تەحنيكا جۇمىلدىرىلعان.
سونداي-اق ساعات 16:25 شاماسىندا قوڭىروزەك اۋىلىندا قاتتى جەلدىڭ سالدارىنان 12 جەكە تۇرعىن ءۇيدىڭ جانە اۋىلدىق مادەنيەت ءۇيىنىڭ شاتىرى بۇلىنگەن. زاقىمدانعان اۋماقتىڭ كولەمى ناقتىلانۋدا. الدىن الا مالىمەت بويىنشا، وقيعادان قازا تاپقاندار مەن زارداپ شەككەندەر جوق.
وقيعا ورنىندا جەرگىلىكتى اتقارۋشى ورگاندار مەن توتەنشە جاعدايلار دەپارتامەنتىنىڭ 27 قىزمەتكەرى جانە بەس تەحنيكا جۇمىس ىستەپ جاتىر. اكىمدىك قولايسىز اۋا رايىنىڭ سالدارىن جويۋ جانە كەلتىرىلگەن شىعىندى ناقتىلاۋ جۇمىستارى جالعاسىپ جاتقانىن ايتتى.
