جاڭاوزەن تۋماسى انۋاربەك يمانباەۆ Tesla كومپانياسىنىڭ ينۆەستورى اتاندى، دەپ حابارلايدى «ادىرنا» ءتىلشىسى Ulysmedia-عا سىلتەمە جاساپ.
ونىڭ وتباسى توعىز جاسىندا، ياعني 1992 جىلى اقش-قا قونىس اۋدارعان. بۇعان اكەسىنىڭ امەريكالىق مۇناي كومپانيالارىنىڭ بىرىندە تاعىلىمدامادان ءوتۋى سەبەپ بولعان.
كەيىن ول وتباسىلىق ءداستۇردى جالعاستىرىپ، ءومىرىن مۇناي سالاسىمەن بايلانىستىرعان. يمانباەۆ اقش-تىڭ ءىرى جەكەمەنشىك كومپانيالارىندا جۇمىس ىستەپ، مۇناي-گاز سەكتورىنا ارنالعان IT-شەشىمدەردى ەنگىزۋمەن اينالىسقان.
2012 جىلى ارىپتەسىنىڭ كومەگىمەن انۋاربەك يلون ماسكپەن تانىسقان. كاليفورنيا شتاتىنداعى فريمونت قالاسىندا ورنالاسقان Tesla زاۋىتىن كورگەننەن كەيىن ول كومپانيانىڭ بولاشاعىنا سەنىپ، ەلگە ورالعان سوڭ بارلىق جيناعان قارجىسىنا Tesla اكتسيالارىن ساتىپ العان. ۋاقىت وتە كەلە ول Tesla-نىڭ، كەيىن SpaceX كومپانياسىنىڭ بىرقاتار توپ-مەنەدجەرلەرىمەن جاقىن ارالاسا باستاعان.
امەريكادا ونداعان جىل ءومىر سۇرسە دە، انۋاربەك انا ءتىلىن جانە ۇلتتىق بولمىسىن ساقتاپ قالعان. ونىڭ ايتۋىنشا، بۇعان اتا-اناسىنىڭ ۇيدە بالالارىمەن تەك قازاق تىلىندە سويلەسۋى ىقپال ەتكەن.
«تسۋكەربەرگتىڭ كورشىلەرى» جوباسىنا بەرگەن سۇحباتىندا ول اقش-قا كوشكەندەردىڭ امەريكالىق ءومىر سالتىنا تولىقتاي بەيىمدەلۋگە تىرىسقاننان گورى، قازاقتىڭ ءداستۇرى مەن مادەنيەتىن قۇرمەتتەپ، ساقتاۋى ماڭىزدى ەكەنىن ايتتى.
«اقش-قا كوشىپ كەلگەندەردىڭ كوبى، مىسالى قىتايلار، اۋەلى وزدەرىنە جەرگىلىكتى ەسىم الادى. ال بىزدە ءبارى باسقاشا بولدى. اكەمىز ءبىزدى، ەڭ الدىمەن، پاتريوت ەتىپ تاربيەلەدى. ءبىز ءوزىمىزدىڭ قازاق ەكەنىمىزدى ماقتان تۇتىپ وستىك. كوپ ادام، ءتىپتى ارىپتەستەرىم دە مەنىڭ ەسىمىمدى ايتا المايتىنىن ايتاتىن. مەن ولارعا: «بۇل – اتا-انام مەن اللا بەرگەن ەسىم. ۇناماسا، ەسىك انا جاقتا» دەپ جاۋاپ بەرەتىنمىن. قازاقستاندىقتارعا ايتار كەڭەسىم – ءوز وتاندارىڭىزدى ماقتان تۇتىڭىزدار، امەريكالىق بولۋعا تىرىسپاڭىزدار»،– دەدى ول.
