تاراز قالاسى اكىمدىگىنىڭ قارجى ءبولىمى قىزمەتكەرلەرى مەملەكەتتىك بالانسقا تيەسىلى مۇلىكتى زاڭسىز تۇردە ساتىپ كەلگەنى انىقتالدى، دەپ حابارلايدى "ادىرنا" ۇلتتىق پورتالى Orda.kz-كە سىلتەمە جاساپ.
بۇزۋشىلىقتى العاش پروكۋراتۋرا انىقتاپ، كەيىن ءىستى ەكونوميكالىق تەرگەۋلەر دەپارتامەنتى تەرگەگەن. تەرگەۋ ناتيجەسىندە شەنەۋنىكتەردىڭ قۇجاتتاردى قولدان جاساپ، كوممۋنالدىق نىسانداردى جەكە تۇلعالار اتىنا راسىمدەپ، كەيىن ولاردى ساتقاندىعى بەلگىلى بولعان. مەملەكەتكە كەلتىرىلگەن زالال 100 ميلليون تەڭگەدەن اسقان.
اقپاراتقا سايكەس، قارجى ءبولىمىنىڭ قىزمەتكەرلەرى 2021–2022 جىلدارى قالاداعى ءۇش بەيرەزيدەنتتىك عيماراتتى جالعان ادامداردىڭ اتىنا راسىمدەپ، كەيىن جەكە ساتىپ الۋشىلارعا وتكىزگەن.
سوتتا ءتورت ادام جاۋاپقا تارتىلدى. ولاردىڭ ەكەۋى ءىس مەرزىمىنىڭ ءوتىپ كەتۋىنە بايلانىستى جاۋاپكەرشىلىكتەن بوساتىلدى.
سوت ۇكىمىمەن ءبىر قىزمەتكەر الاياقتىق جانە ىسىراپ ەتۋ باپتارى بويىنشا كىنالى دەپ تانىلىپ، ءتورت جىلعا باس بوستاندىعىنان ايىرىلدى جانە بەس جىل بويى مەملەكەتتىك مۇلىكپەن جۇمىس ىستەۋگە تىيىم سالىندى.
تاعى ءبىر ادامعا ءتورت جارىم جىلعا باس بوستاندىعىن شەكتەۋ جازاسى تاعايىندالىپ، وعان مەملەكەتتىك قىزمەتتە جۇمىس ىستەۋ قۇقىعىنان ءومىر بويىنا ايىرىلۋ جازاسى بەرىلدى.
