اباي اتىنداعى «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق مۋزەي-قورىعىندا «قازاعىمنىڭ ءۇنىسىڭ سەن، دومبىرا!» اتتى كورمە ۇيىمداستىرىلدى. اتالۋلى شارا ۇلتتىق دومبىرا كۇنىن كەڭىنەن ناسيحاتتاۋعا جانە قازاق حالقىنىڭ ءتول ونەرى مەن مادەني مۇراسىن دارىپتەۋگە باعىتتالعان.
مۋزەي ديرەكتورى ۇلان ساعاديەۆتىڭ ايتۋىنشا، 1 شىلدەدەن باستاپ كۇشىنە ەنگەن جاڭا كونستيتۋتسيادا قازاقستان حالقىنىڭ مادەنيەتى مەن ۇلتتىق بولمىسىن دامىتۋعا ەرەكشە ءمان بەرىلگەن.
– مۋزەيىمىزگە كەلگەن بارشا قوناقتارعا قوش كەلدىڭىزدەر دەيمىن. وزدەرىڭىز بىلەتىندەي، 1 شىلدەدەن باستاپ جالپىحالىقتىق رەفەرەندۋمدا قابىلدانعان قازاقستان رەسپۋبليكاسىنىڭ جاڭا كونستيتۋتسياسى كۇشىنە ەندى. بۇل – ەلىمىزدىڭ بولاشاعىن ايقىندايتىن ماڭىزدى قۇجات. وسىنداي ايتۋلى كەزەڭدە ۇلتتىق دومبىرا كۇنىنە وراي مۋزەيىمىزدە ارنايى كورمە ۇيىمداستىرىپ وتىرمىز. جاڭا كونستيتۋتسيادا مادەنيەت پەن ۇلتتىق ونەردى دامىتۋ ماسەلەسىنە ەرەكشە كوڭىل بولىنگەن. كورمەدە كاسىبي ورىنداۋشىلاردىڭ مۋزىكالىق اسپاپتارى قويىلعان. ال قورىمىزداعى ەڭ قۇندى جادىگەرلەردىڭ ءبىرى – ۇلى ابايدىڭ دومبىراسى، – دەدى ۇلان ساعاديەۆ.
مۋزەيدىڭ ەكسپوزيتسيالار مەن كورمەلەردى ۇيىمداستىرۋ ءبولىمىنىڭ مەڭگەرۋشىسى بۇلبۇلناز ۋاحمەتوۆا كورمەدە ءداۋىردىڭ رۋحىن ساقتاپ تۇرعان بىرەگەي جادىگەرلەر ۇسىنىلعانىن اتاپ ءوتتى.
– بۇگىن «قازاعىمنىڭ ءۇنىسىڭ سەن – دومبىرا!» اتتى كورمەنىڭ اشىلۋى وتۋدە. مۇندا بەلگىلى كۇيشى-ورىنداۋشىلاردىڭ مۋزىكالىق اسپاپتارىمەن قاتار، مۋزەي قورىندا ساقتالعان ۇلى ابايدىڭ دومبىراسى جانە شاكارىمنىڭ ۇلى احاتتىڭ دومبىراسى كوپشىلىك نازارىنا ۇسىنىلىپ وتىر. سونىمەن بىرگە ءار جىلدارى مۋزەيگە ەلىمىزدىڭ ءار وڭىرىنەن سىيعا تارتىلعان دومبىرالار دا كورمەگە قويىلعان. كورمە ءبىر اي بويى جۇمىس ىستەيدى. بارشا سەمەيلىكتەر مەن قالا قوناقتارىن كەلىپ كورۋگە شاقىرامىز، – دەدى بۇلبۇلناز ۋاحمەتوۆا.
كورمەنىڭ اشىلۋ سالتاناتى دومبىرانىڭ كۇمبىرلەگەن ۇنىمەن ءورىلدى. شىعارماشىلىق ۇجىمداردىڭ جاس ونەرپازدارى كوپشىلىككە تانىمال كۇيلەردى ورىنداپ، كورەرمەندەردىڭ ىستىق ىقىلاسىنا بولەندى. كەلۋشىلەر جاس دومبىراشىلاردىڭ ورىنداۋشىلىق شەبەرلىگى مەن نازىك مۋزىكالىق تالعامىنا جوعارى باعا بەردى.
