فرانتسيا ۇكىمەتى 2027 جىلعى پرەزيدەنت سايلاۋىنىڭ كۇندەرىن بەكىتتى. سايلاۋدىڭ ءبىرىنشى كەزەڭى 18 ساۋىردە، ال ەكىنشى كەزەڭى 2 مامىردا وتەدى، دەپ حابارلايدى «ادىرنا» ءتىلشىسى Le Figaro-عا سىلتەمە جاساپ.
بۇل شەشىم سوڭعى اپتالاردا ساياسي شتابتار اراسىندا قىزۋ تالقىلانعان ماسەلەگە نۇكتە قويدى. ويتكەنى كانديداتتار سايلاۋالدى ناۋقانعا دايىندىقتى باستاپ كەتكەنىمەن، سايلاۋ كۇنتىزبەسى ءالى ناقتى بەكىتىلمەگەن ەدى.
فرانتسۋز باق-تارىنىڭ مالىمەتىنشە، بيلىك سايلاۋدى 11 جانە 25 ساۋىردە وتكىزۋ نەمەسە ونى ءبىر اپتاعا كەيىن شەگەرۋ سىندى نۇسقالاردى قاراستىرعان. ناتيجەسىندە ۇكىمەت ەكىنشى نۇسقانى تاڭداعان. بۇل رەتتە كونستيتۋتسيا تالاپتارى شەشىم قابىلداۋ مۇمكىندىگىن شەكتەگەن. 1958 جىلعى فرانتسيا كونستيتۋتسياسىنا سايكەس، پرەزيدەنت سايلاۋى مەملەكەت باسشىسىنىڭ وكىلەتتىك مەرزىمى اياقتالعانعا دەيىن 20–35 كۇن بۇرىن وتكىزىلۋى ءتيىس.
وسى تالاپقا ساي، سايلاۋدىڭ ەكىنشى كەزەڭى قازىرگى پرەزيدەنت ەممانۋەل ماكرون وكىلەتتىگىنىڭ اياقتالاتىن كۇنى – 2027 جىلدىڭ 14 مامىرىندا تۇنگى ساعات 00:00-گە دەيىن وتكىزىلۋى قاجەت. ماكروننىڭ ەكىنشى بەس جىلدىق پرەزيدەنتتىك مەرزىمى 2022 جىلدىڭ 14 مامىرىندا باستالعان بولاتىن.
سونىمەن قاتار سايلاۋ كۇندەرىنىڭ فرانتسياداعى كوكتەمگى مەكتەپ دەمالىسىمەن تۇسپا-تۇس كەلۋى دە نازار اۋدارتىپ وتىر. بۇل سايلاۋشىلاردىڭ بەلسەندىلىگىنە اسەر ەتۋى مۇمكىن، ويتكەنى كوپتەگەن ازامات ءدال وسى كەزەڭدە دەمالىسقا كەتەدى. ساراپشىلاردىڭ پىكىرىنشە، بۇل جاعداي ءبىرىنشى كەزەڭدەگى سايلاۋعا قاتىسۋ دەڭگەيىنە جانە ساياسي كۇشتەردىڭ اراسالماعىنا ىقپال ەتۋى ىقتيمال.
بۇعان دەيىن قۇرىلتاي سايلاۋىنىڭ قاشان وتەتىنىن جازعان ەدىك.
