قازاقستان مۇسىلماندارى ءدىني باسقارماسى نەكە شارتتارىنىڭ تالاپتارى مەن شارتتارى تۋرالى ايتتى، دەپ حابارلايدى «ادىرنا» ءتىلشىسى.
قمدب نەكە قيۋ بارىسىندا ەكى جاقتىڭ رازىلىعى وتە ماڭىزدى ەكەنىن جەتكىزدى. ايتۋلارىنشا، مۇنسىز نەكە زاڭسىز ءارى دۇرىس بولىپ ەسەپتەلمەيدى. سونىمەن قاتار نەكەنىڭ جۇزەگە اسۋى ءۇشىن ۇيلەنۋشى تاراپتاردىڭ سوزدەرى تولىقتاي انىق بولۋى ءارى ەكى جاقتىڭ مالىمدەمەسى ءبىر ۋاقىتتا جانە ءبىر جەردە، ياعني ءبىر ماجىلىستە ايتىلۋى كەرەك.
باسقارما نەگىزى ءتورت شارتقا دا توقتالدى. ءبىرىنشىسى – قىز بالانىڭ اتا-اناسىنىڭ كەلىسىمى مەن ريزاشىلىعى، ەكىنشىسى – كۋاگەرلەردىڭ قاتىسۋى، ءۇشىنشىسى – كەدەرگىلەردىڭ بولماۋى جانە ءتورتىنشىسى ء– ماھر.
ء«ماھر – ەر ادامنىڭ نەكە قيىلۋ بارىسىندا قالىڭدىققا ءوز ريزاشىلىعىمەن بەرەتىن شاريعي سىيى. حانافي ءمازھابىندا ءماھردىڭ ەڭ تومەنگى شەگى 10 ديرحام. ساحابالار ءومىر سۇرگەن زاماندا 10 ديرحام ءبىر التىن دينارعا تەڭ بولعان. بۇل قازىرگى ولشەممەن 4,25 گرامم التىن نەمەسە سوعان تەڭ كەلەتىن اقشالاي قاراجاتقا (نارىقتاعى قۇنىنا) سايكەس كەلەدى. ءماھردىڭ مولشەرىن ەر ازاماتتىڭ ماتەريالدىق مۇمكىندىگىنە قاراپ، وتباسىنىڭ الەۋمەتتىك جاعدايىن ەسكەرە وتىرىپ ايتقان ءجون. ويتكەنى ءماھر كۇيەۋ جىگىتتى قارىزعا باتىراتىنداي كوپ نەمەسە قىزدىڭ كوڭىلىن قالدىراتىنداي از بولماۋى كەرەك»،–دەلىنگەن حابارلامادا.
قمدب كۇيەۋ جىگىتتىڭ ءماھردى بىردەن بەرۋگە شاماسى جەتپەسە، يسلامدا ونىڭ ءبىر بولىگىن الدىن الا بەرىپ، قالعانىن كەيىن بەرۋگە رۇقسات ەتىلەتىنىن اتاپ ءوتتى.
