بۇگىن، 29 ماۋسىمدا سەنات توراعاسى ماۋلەن اشىمباەۆتىڭ توراعالىعىمەن پالاتانىڭ قورىتىندى وتىرىسى ءوتتى، دەپ حابارلايدى «ادىرنا» ءتىلشىسى.
جيىندا مەملەكەت باسشىسىنىڭ رەفورمالارىن زاڭنامالىق تۇرعىدان قامتاماسىز ەتۋ باعىتىندا اتقارىلعان جۇمىستارعا قورىتىندى جاسالدى جانە بىرقاتار ماڭىزدى زاڭدار ماقۇلداندى.
ماۋلەن اشىمباەۆ بيىل قازاقستان پارلامەنتىنىڭ 30 جىلدىعى اتالىپ ءوتىپ جاتقانىن ايتا كەلىپ، وسى ۋاقىت ىشىندە پارلامەنت وكىلدى دەموكراتيانىڭ نەگىزگى ينستيتۋتىنا اينالعانىن جانە ەل ءومىرىنىڭ بارلىق نەگىزگى سالاسىن قامتيتىن ماڭىزدى زاڭداردى قابىلداعانىن اتاپ ءوتتى. سونداي-اق ول ەلىمىز ءۇشىن تاعدىرشەشتى كەزەڭدە سەنات دەپۋتاتتارى مەملەكەت باسشىسى قاسىم-جومارت توقاەۆتىڭ سەنىمىن جوعارى باعالايتىنىن جەتكىزدى جانە جاڭا كونستيتۋتسيانى تولىق ىسكە اسىرۋ مەن ادىلەتتى قازاقستاندى قۇرۋ جولىندا بارلىق پروگرەسسيۆتى قوعامدىق-ساياسي كۇشتەردىڭ بىرىگۋى اسا ماڭىزدى ەكەنىنە توقتالدى.
«سەنات ءوز تاريحىندا 890-نان استام وتىرىس وتكىزىپ، 3,5 مىڭنان استام زاڭدى قابىلداپ، ماقۇلدادى. ءاربىر ونىنشى زاڭ دەپۋتاتتاردىڭ باستاماسىمەن ازىرلەنگەن. بۇل قۇقىقتىق اكتىلەر قازاقستاننىڭ جاڭا ساياسي، ەكونوميكالىق جانە فيسكالدىق مودەلىنىڭ نەگىزىن قالاپ، الەۋمەتتىك ساياساتتىڭ بەرىك قۇقىقتىق بازاسىن قالىپتاستىردى. سونىمەن قاتار سوت جانە قۇقىق قورعاۋ جۇيەسىن جاڭعىرتۋ، ازاماتتاردىڭ قۇقىقتارىن قورعاۋ، زاڭ ۇستەمدىگىن قامتاماسىز ەتۋ جانە ۇلتتىق قاۋىپسىزدىكتى نىعايتۋ ءاردايىم باسىم باعىتتاردىڭ قاتارىندا بولدى. زاڭ شىعارۋ قىزمەتىمەن قاتار پالاتا باسقا دا باعىتتاردا بەلسەندى جۇمىس جۇرگىزدى. وسى كەزەڭدە 60-تان استام پارلامەنتتىك تىڭداۋ مەن 3 مىڭنان استام جوسپارلى ءىس-شارا ۇيىمداستىرىلدى. ۇكىمەتكە قوعامداعى وزەكتى ماسەلەلەر بويىنشا 3 مىڭعا جۋىق دەپۋتاتتىق ساۋال جولداندى. وسىنداي اۋقىمدى جۇمىستىڭ بارلىعى حالىقتىڭ مۇددەسىن قورعاۋعا جانە مەملەكەتىمىزدى نىعايتۋعا باعىتتالعانىن اتاپ وتكەن ءجون»، – دەدى ول.
ەستەرىڭىزگە سالا كەتەيىك، قازاقستاننىڭ جاڭا كونستيتۋتسياسى 1 شىلدەدە كۇشىنە ەنەدى.
