فوتو: Gov.kz
سەناتتىڭ جالپى وتىرىسىندا ءماجىلىس قابىلداعان "قازاقستان ۇكىمەتى مەن تۇركيا ۇكىمەتى اراسىنداعى قازاقستان مەن تۇركيانىڭ اۋە كەڭىستىگى ارقىلى اسكەري مۇلىك پەن پەرسونالدى ترانزيتتەۋ تۋرالى كەلىسىمدى راتيفيكاتسيالاۋ تۋرالى" زاڭدى ماقۇلدادى، دەپ حابارلايدى “ادىرنا”.
اتالعان قادام ەكى ەل اراسىنداعى قورعانىس سالاسىنداعى ىنتىماقتاستىقتى دامىتۋعا سەپتىگىن تيگىزەدى دەپ اتاپ وتىلگەن.
قۇجاتتى سەناتور دارحان قىدىرالى تانىستىردى. كەلىسىمگە ەكى مەملەكەت اۋماعىنىڭ ۇستىنەن اسكەري مۇلىك پەن پەرسونالدى اۋە ارقىلى ترانزيتتەۋ ءۇشىن تاراپتار ەلدەردىڭ اۋە كەڭىستىگىن ءوزارا پايدالانۋ، اسكەري ىنتىماقتاستىققا قولايلى جاعداي جاساۋ جانە شارتتاردى رەتتەۋ ماقساتىندا 2024 جىلعى 11 قىركۇيەكتە قول قويىلعان.
"كەلىسىم قازاقستان رەسپۋبليكاسىنا بۇۇ-نىڭ بىتىمگەرشىلىك ميسسيالارى شەڭبەرىندە بەلگىلەنگەن جەرلەرگە جەتۋ ءۇشىن تۇركيا اۋە كەڭىستىگىن جۇيەلى تۇردە پايدالانۋعا مۇمكىندىك بەرەدى. وزدەرىڭىزگە ءمالىم، "قازاقستان رەسپۋبليكاسىنىڭ ۇلتتىق قاۋىپسىزدىگى تۋرالى" زاڭعا سايكەس قازاقستان رەسپۋبليكاسى راتيفيكاتسيالاعان حالىقارالىق شارتتا كوزدەلگەن جاعدايدان باسقا، قازاقستان اۋماعى ارقىلى شەت مەملەكەتتىڭ اسكەري قۇرىلىمدارىن، قارۋ-جاراعى مەن اسكەري تەحنيكاسىن ترانزيتتەۋگە جول بەرىلمەيدى", – دەدى دەپۋتات.
كەلىسىم تاراپتارعا قاۋىپسىزدىك پەن باقىلاۋ تەتىكتەرىن قامتاماسىز ەتەدى. اسكەري مۇلىك پەن پەرسونال ءترانزيتى تەك ەكى مەملەكەتتىڭ ۋاكىلەتتى ورگاندارى بەرەتىن رۇقسات نەگىزىندە جۇرگىزىلەدى.
"رۇقساتتارعا سۇراۋ سالۋلار بەلگىلەنگەن مەرزىمدەردە ديپلوماتيالىق ارنالار ارقىلى بەرىلەدى. جىلدىق رۇقسات تەك اسكەري-ترانسپورتتىق اۆياتسياعا بەرىلەتىنىن اتاپ وتەمىز. ديپلوماتيالىق رۇقساتتىڭ ءبىر جىلدىق ءنومىرى اسكەري مۇلىك پەن پەرسونال، سونىمەن قاتار رەسمي دەلەگاتسيالار، گۋمانيتارلىق كومەك، وقۋ-جاتتىعۋلاردى قامتاماسىز ەتۋ، ديپلوماتيالىق جۇك ءترانزيتى ءۇشىن قولدانىلادى. بۇل رەتتە ءاربىر مەملەكەت ترانزيتكە كەز كەلگەن رۇقسات بەرۋ تۋرالى سۇراۋ سالۋدان باس تارتۋ، سونداي-اق اسكەري مۇلىك پەن پەرسونالدىڭ ءترانزيتى وسى كەلىسىمنىڭ ەرەجەلەرىنە سايكەس كەلمەيتىن جاعدايدا بەرىلگەن رۇقساتتىڭ قولدانىلۋىن توقتاتۋ نەمەسە قايتارىپ الۋ قۇقىعىن وزىنە قالدىرادى", – دەپ اتاپ ءوتتى ول.
دارحان قىدىرالى كەلىسىمدى راتيفيكاتسيالاۋ اۋە كەمەلەرىنە ەكى مەملەكەتتىڭ اۋە كەڭىستىگىن پايدالانۋعا مۇمكىندىك بەرەتىنىن جەتكىزدى.
سەناتور الىشەر ساتۆالديەۆتىڭ سوزىنشە، قازاقستان ءۇشىن باۋىرلاس تۇركيامەن ستراتەگيالىق ىقپالداستىقتى ودان ءارى نىعايتۋ – سىرتقى ساياساتىمىزدىڭ ماڭىزدى باسىمدىقتارىنىڭ ءبىرى.
"قۇجاتتا اسكەري مۇلىك پەن پەرسونالدىڭ ءترانزيتىن رەتتەۋدىڭ ناقتى تەتىكتەرى ايقىندالعان، ۋاكىلەتتى ورگاندار اراسىنداعى ءوزارا ءىس-قيمىل ءتارتىبى جۇيەلەنىپ، راسىمدەر وڭتايلاندىرىلادى. ەڭ باستىسى قازاقستان رەسپۋبليكاسىنىڭ ەگەمەندىگى، ۇلتتىق مۇددەسى مەن قاۋىپسىزدىك باسىمدىقتارى تولىق ساقتالادى. ەلىمىز كەز كەلگەن جاعدايدا ترانزيتكە رۇقسات بەرمەۋگە نەمەسە ونى توقتاتۋعا تولىق قۇقىلى. بۇل – اسا ماڭىزدى ساياسي ءارى قۇقىقتىق كەپىلدىك", – دەدى ول.
