سەنات دەپۋتاتتارى بيۋدجەت كودەكسىن تالقىلادى. وتىرىس بارىسىندا ماۋلەش اشىمباەۆ بيۋدجەت قارجىسىن ۇنەمدەۋگە قاتىستى اقش-تى مىسالعا كەلتىردى، دەپ حابارلايدى "ادىرنا" ۇلتتىق پورتالى.
توراعا اشىمباەۆ:
"قازىر كوبىمىز امەريكادا نە بولىپ جاتقانىن، جاڭا اكىمشىلىك قانداي شارالار قابىلداپ جاتقانىن كورىپ وتىرمىز. ولار يلون ماسك باسقاراتىن جاڭا مينيسترلىك قۇردى. ۇكىمەتتىڭ تيىمدىلىگىن ارتتىرۋ جونىندەگى مينيسترلىك دەپ اتالادى. قازىر وسى مينيسترلىك بيۋدجەتتى قىسقارتۋ ماسەلەسىمەن اينالىسىپ جاتىر. ءار مەملەكەتتىك ورگانعا تالداۋ جاساپ، ءتيىمسىز دەپ ساناعان دۇنيەلەردى الىپ تاستادى. ولار قانشا اقشا ۇنەمدەيتىنىن بايقاپ كورەيىك. ارينە، بىزگە ەشكىمنەن ەشتەڭە كوشىرۋدىڭ قاجەتى جوق. بىراق شىعىستاردى ءتيىمدى جۇمساۋ ماسەلەسىنە ءبىز دە نازار اۋدارۋىمىز قاجەت" - دەدى ول.
سەنات سپيكەرى بيۋدجەت ەرەجەلەرى مەملەكەتتىك بيۋدجەتتى ءتيىمدى رەتتەۋ ءۇشىن جەتكىلىكسىز ەكەنىن اتاپ وتكەن.
"وسىعان بايلانىستى ءبىرىنشى ماسەلە – قابىلداعان ەرەجەلەرىمىزدى ورىنداۋ. ەكىنشى ماسەلە - ءومىر الدەقايدا كەڭ جانە بيۋدجەت پروتسەسى الدەقايدا كۇردەلى، ول، بالكىم، تەك ەكى ەرەجە ارقىلى رەتتەلمەيدى. ال ءتيىمدى ەمەس شىعىنداردى بولدىرماۋ، راتسيونالدى ەمەس شىعىنداردى بولدىرماۋ ەرەجەسى قايدا؟ قازىر قوعامدا ققس تۋرالى پىكىرتالاس ءجۇرىپ جاتىر، ۇكىمەتتىڭ ارگۋمەنتتەرىن تۇسىنەمىز. بىراق قازىرگى شىعىنداردى دۇرىس ءبولۋ جانە كەيبىرىن قىسقارتۋ ماڭىزد", – دەدى اشىمباەۆ.
