سەناتتىڭ جالپى وتىرىسىندا قازاقستان مەن قىرعىزستان ۇكىمەتتەرى اراسىنداعى استانا مەن بىشكەكتەگى عيماراتتار مەن جەر ۋچاسكەلەرىن ءوزارا وتەۋسىز پايدالانۋعا بەرۋ تۋرالى كەلىسىمدى راتيفيكاتسيالاندى، دەپ حابارلايدى «ادىرنا» ءتىلشىسى.
سەناتتىڭ مالىمەتىنشە، بۇل كەلىسىم ەكى ەلدىڭ ەلشىلىكتەرىنىڭ قاجەتتىلىكتەرىن قامتاماسىز ەتۋ ءۇشىن قاجەت. قۇجاتقا 2025 جىلدىڭ 22 تامىزىندا قول قويىلعان. جەر تەلىمدەرى مەن عيماراتتار 49 جىل مەرزىمگە پايدالانۋعا بەرىلىپ، كەيىن بۇل مەرزىمدى ۇزارتۋ مۇمكىندىگى قاراستىرىلعان.
كەلىسىمگە سايكەس، قازاقستاننىڭ بىشكەكتەگى ەلشىلىگىنە كولەمى 0,75 گەكتار جەر ۋچاسكەسى بولىنەدى. سونداي-اق قازاقستان ەلشىسىنىڭ رەزيدەنتسياسى ءۇشىن جالپى اۋدانى 531,66 شارشى مەتر بولاتىن كوتتەدج جانە وعان ىرگەلەس 0,17 گەكتار اۋماق بەرىلەدى.
ال قىرعىزستاننىڭ استاناداعى ەلشىلىگىنە كولەمى 0,74 گەكتار جەر تەلىمى ۇسىنىلادى. قىرعىزستان ەلشىسىنىڭ رەزيدەنتسياسى ءۇشىن اۋدانى 1267,8 شارشى مەتر كوتتەدج جانە وعان ىرگەلەس 0,125 گەكتار اۋماق بولىنەدى.
سەناتتىڭ حالىقارالىق قاتىناستار كوميتەتىنىڭ توراعاسى اندرەي لۋكين بۇل مۇلىكتەردىڭ ەكى مەملەكەتتە دە بارلىق سالىق پەن الىم تۇرلەرىنەن بوساتىلاتىنىن ايتتى.
«تاراپتار عيماراتتاردى سالۋعا، جوندەۋگە جانە كۇتىپ ۇستاۋعا، سونداي-اق كوممۋنالدىق قىزمەتتەردى تولەۋگە بايلانىستى بارلىق شىعىندى قابىلداۋشى ەلدە قولدانىستاعى تاريفتەرگە سايكەس وزدەرى وتەيدى»، – دەدى ول.
سەناتتا اتاپ وتىلگەندەي، كەلىسىمدى راتيفيكاتسيالاۋ قازاقستان مەن قىرعىزستان اراسىنداعى دوستىق قارىم-قاتىناستى ودان ءارى نىعايتۋعا، ساياسي ديالوگتى دامىتۋعا جانە ەكىجاقتى ىنتىماقتاستىقتى كەڭەيتۋگە ىقپال ەتەدى.
