قىرعىزستان پرەزيدەنتى سادىر جاپاروۆ ەلدە مەملەكەت باسشىسىنا تىكەلەي باعىناتىن تەرگەۋ كوميتەتىن قۇرۋ جوسپارىن جاريالادى. بۇل تۋرالى «كابار» اگەنتتىگى جازدى، دەپ حابارلايدى "ادىرنا".
پرەزيدەنتتىڭ ايتۋىنشا، جاڭا ورگانعا تەرگەۋ جۇرگىزۋدىڭ بارلىق فۋنكتسياسى بەرىلەدى. بۇل تەرگەۋدىڭ تاۋەلسىزدىگىن قامتاماسىز ەتىپ، ازاماتتاردىڭ قۇقىقتارىن قورعاۋعا مۇمكىندىك بەرەدى.
جاپاروۆتىڭ سوزىنشە، باس جانە اسكەري پروكۋراتۋرا بارلىق ورگانداردىڭ ارەكەتىنىڭ زاڭدىلىعىنا قاداعالاۋ جۇرگىزەدى.
«ەگەر نە ءۇشىن تەرگەۋ كوميتەتىن قۇرۋ قاجەت دەپ سۇراساڭىزدار، ءبىز مەملەكەتتىڭ بولاشاعى مەن تۇراقتىلىعى تۋرالى ويلاۋىمىز كەرەك»، – دەدى ول سۇحباتىندا.
جاپاروۆ ەلدە ادىلەتسىز تەرگەۋ جاعدايلارى كەزدەسەتىنىن دە مويىندادى. ونىڭ ايتۋىنشا، كەيبىر كەزدە ءىىم مەن ۇلتتىق قاۋىپسىزدىك مەملەكەتتىك كوميتەتى (ۇقمك) باسشىلارى جەدەل قىزمەتكەرلەردىڭ مالىمەتى نەگىزىندە تەرگەۋشىلەرگە قىلمىستىق ءىس قوزعاۋدى تالاپ ەتۋى مۇمكىن.
جاپاروۆ جاڭا كوميتەت «شيكى» نەمەسە قولدان جاسالعان ىستەردى قابىلدامايتىنىن ايتتى.
«ادىلەتسىزدىككە تاپ بولعان ازاماتتار قاماۋعا الىنبايدى، بىردەن بوساتىلادى. وسىلايشا ادام قۇقىقتارىنىڭ كەمىندە 95%-ىن قامتاماسىز ەتە الامىز»، – دەدى ول.
رەفورمانى كەلەسى جىلى باستاۋ جوسپارلانىپ وتىر. پرەزيدەنتتىڭ سوزىنشە، عيماراتتار مەن تەحنيكالىق بازا دايىندالىپ، جارلىق شىعارىلادى. ءتيىستى زاڭ جوبالارى جوگوركۋ كەنەش قاراۋىنا ەنگىزىلەدى.
ال ۇقمك بارلاۋ جانە قارسى بارلاۋ، كونستيتۋتسيالىق قۇرىلىستى قورعاۋ، تەرروريزم، ەكسترەميزم، بقزاقىلىق جانە ەسىرتكىنىڭ زاڭسىز اينالىمىمەن كۇرەس باعىتىندا عانا جۇمىس ىستەيدى. وسى سالالار بويىنشا تەرگەۋ قۇقىعى ساقتالادى، بىراق ەكونوميكاعا ارالاسپايدى. پرەزيدەنتتىڭ ايتۋىنشا، رەفورما ناتيجەسىندە بۇل ورگان «ناعىز ارنايى قىزمەتكە» اينالۋى ءتيىس.
ايتا كەتەيىك، تەرگەۋ كوميتەتىن قۇرۋ تۋرالى اڭگىمە اقپان ايىنىڭ ورتاسىندا، ۇقمك باسشىلىعىنىڭ وتستاۆكاسىنان كەيىن كۇشەيگەن. ساراپشىلار جاڭا ورگان قۇرۋ كەزىندە بىرقاتار تاۋەكەلدەر بار ەكەنىن ايتىپ وتىر.
ادۆوكات قانات حاسانوۆ تەرگەۋ كوميتەتى تۋرالى باستاما 2017 جىلعا دەيىن دە تالقىلانعانىن ەسكە سالدى. ونىڭ پىكىرىنشە، مۇنداي ورگان قاجەت بولعانىمەن، ونىڭ مودەلى ماڭىزدى. ەگەر كوميتەت تەك لاۋازىمدىق قىلمىستارمەن عانا اينالىسسا، ساياسي قىسىم قۇرالىنا اينالۋ قاۋپى بار.
قىرعىزستاننىڭ بۇرىنعى پرەمەر-ءمينيسترى فەليكس كۋلوۆ تا باستامانى قىزىقتى دەپ باعالادى، بىراق اسىعىستىقتان ساق بولۋعا شاقىردى. ونىڭ پىكىرىنشە، بارلىق تەرگەۋ فۋنكتسياسىن ءبىر ورگانعا بىردەن بەرۋ ۇيىمداستىرۋشىلىق ءارى قارجىلىق تۇرعىدان قيىن. كۋلوۆ كەزەڭ-كەزەڭىمەن رەفورما جۇرگىزۋدى ۇسىنىپ، مەملەكەتكە قارسى قىلمىستاردى ۇقمك قۇزىرىندا قالدىرۋدى، ال جالپى قىلمىستاردى ءىىم تەرگەۋىن جالعاستىرۋدى ءجون دەپ سانايدى.
ساراپشىلاردىڭ پىكىرىنشە، مۇنداي ءتاسىل جۇيەگە شامادان تىس جۇكتەمە تۇسىرمەي، باسقارۋشىلىق داعدارىستىڭ الدىن الۋعا مۇمكىندىك بەرەدى.
